അ,ആ,ഇ,ഈ,ഉ,ഊ…

1

അ-സാധാരണമാം
വിധം
ഭാവിയിൽ
പെൺകുട്ടിയാകാൻ
സാധ്യതയുള്ള എന്റെ ശരീരം
ആണുങ്ങളുടെ
ലോകം
ഉപേക്ഷിക്കുന്നു

2

ആ-കാശങ്ങളും
ഭൂമിയും
ഞങ്ങൾക്കന്യം

ഒരു പട്ടി
സ്വന്തം വാല് കടിച്ച്
വട്ടം കറങ്ങും മാതിരി
ഞാനെന്റെ ശരീരത്തിൽ
വട്ടം കറങ്ങി

തുടക്കവും
ഒടുക്കവുമില്ലാതെ

3.

ഇ-ത്തവണ,
എന്റെ കാലുകൾക്കിടയിൽ
ഞാൻ ഒരു നുണയായിരുന്നു

എന്റെ സത്യം
മറ്റെവിടെയോ
വിശ്രമിക്കുന്നു

കുപ്പായങ്ങൾ
എന്റെ
ഉടലിനോട്
സദാ
പരാജയപ്പെടുന്നു.

4.

ഈ-മരണം
അത്രയും സ്വാഭാവികമാണ്,
ജീവിച്ചിരിക്കുന്നവർക്ക്
മനസ്സമാധാനം
വേണമായിരുന്നു

അതുകൊണ്ട്
ഞാൻ മരിക്കുന്നു.

5.

ഉ-ലകം മുഴുവൻ
ആണുങ്ങൾക്ക്
തീറെഴുതികൊടുത്തതാരാകും ?

ആണുങ്ങളുടേതാകരുത് ലോകം

6

ഊ-തി വീർപ്പിക്കാൻ മാത്രം
ജീവിതത്തിലെന്തുണ്ട്

വേദനയല്ലാതെ

7

ഋ-തുക്കളെല്ലാമെന്റെ ചില്ലയിൽ
പാർക്കട്ടെ

കിളികളുപേക്ഷിച്ച ഇതേ ചില്ലയിൽ

8

എ-ത്ര ദൂരെയാണ് സ്വർഗ്ഗം
എത്ര ആകാശങ്ങൾക്കകലെ ?

എത്ര ഭൂഗോളങ്ങൾക്കകലെ?

അവിടെ പാർക്കുന്നുണ്ടാകുമോ
എന്റെ കൂടപിറപ്പുകൾ ?

വിശപ്പിൽ വിഷം കഴിച്ചവർ

9

ഏ-തോ ഒരു കിളിയുടെ
പാട്ടാണ് എന്റെ ഉടൽ,

തൊട്ടറിയില്ല

ശൂന്യതയിൽ മാത്രം
കേൾക്കാം

മിണ്ടാതിരി

10

ഐ-രാവതം കണക്കൊരു മേഘം ദൂരെ

ആകാശത്തിലേക്ക്
നീട്ടാം ഞാനെന്റെ ചില്ല

മാറിപ്പോയേക്കുമോ
കൂട്ടുകൂടാതിരിക്കുമോ

11

ഒ-രിടത്ത് ഒരിടത്ത് എന്ന്
തുടങ്ങുന്ന കഥയിൽ
നിങ്ങളെന്നെ കണ്ടെത്തില്ല,

എനിക്ക് ഭൂമിയിലിടമില്ല

12

ഓ-രോ ചലനങ്ങളിലും
ഞാൻ പ്രേതം

ശരീരങ്ങളുടെ നടക്കാത്ത
ആഗ്രഹങ്ങളാണ്
പ്രേതങ്ങളായി ഭൂമിയിൽ
വട്ടം ചുറ്റുന്നത്

13

ഔ-ഷധങ്ങളൊന്നും
എന്റെ ശരീരത്തിനേൽക്കില്ല

സ്നേഹം ചികിത്സിച്ചേക്കാം

ഉണക്കിയേക്കാം ഈ
മുറിവ്

തൊട്ടൂടെ, സ്നേഹത്തോടെ
എന്റെ ഉടൽ
വല്ലപ്പോഴും

കണ്ടൂടെയത് ?

14.

അം അ

അമ്മേ…