ഇതുവരെ 85,000 വീസകൾ നൽകി’: ഇന്ത്യക്കാരെ മാടിവിളിച്ച് ചൈന

• നടപടികളിൽ ഇളവ്

ന്യൂഡൽഹി: ഏപ്രിൽ ഒൻപതുവരെ ഇന്ത്യൻ പൗരന്മാർക്കായി 85,000ൽ അധികം വീസകൾ അനുവദിച്ചതായി ഇന്ത്യയിലെ ചൈനീസ് എംബസി അറിയിച്ചു. ചൈന സന്ദർശിക്കാൻ കൂടുതൽ ഇന്ത്യൻ പൗരന്മാരെ ക്ഷണിക്കുന്നുവെന്നും എക്‌സിലെ കുറിപ്പിൽ ചൈനീസ് അംബാസഡർ ഷു ഫെയ്ഹോങ് പറഞ്ഞു. ഇന്ത്യൻ സന്ദർശകർക്കുള്ള വീസ പ്രക്രിയ ലളിതമാക്കുന്ന നടപടികളുടെ ഭാഗമായി, വിവിധ ഇളവുകൾ ചൈനീസ് സർക്കാർ നടപ്പാക്കിയിട്ടുണ്ട്.

ഇന്ത്യൻ വിനോദസഞ്ചാരികളെ ചൈന വിളിക്കുന്നത് രാജ്യത്തിന്റെ സംസ്ക്കാരം, വിനോദസഞ്ചാര കേന്ദ്രങ്ങൾ, ഉത്സവങ്ങൾ, വിദ്യാഭ്യാസ സാധ്യതകൾ തുടങ്ങിയവ മുൻനിർത്തിയാണ്. കോവിഡ് മൂലമുണ്ടായ യാത്രാ-പഠന തടസ്സങ്ങൾ മാറി ഇന്ത്യയിൽനിന്നുള്ള വിദ്യാർഥികൾക്ക് ചൈനയിലേക്കു പോകാനുള്ള മാർഗങ്ങൾ ഇതോടെ എളുപ്പമായേക്കും.