ഇന്ത്യൻ കോസ്റ്റ്ഗാർഡിൽ ജോലി ഒഴിവ്

• ഇപ്പോൾ അപേക്ഷിക്കാം

ഇന്ത്യൻ കോസ്റ്റ്ഗാർഡിൽ വിവിധ ഒഴിവുകളിലേക്ക് അപേക്ഷകൾ ക്ഷണിച്ചു. തീരസംരക്ഷണ സേനയിലെ 02/2025 ബാച്ചിലേക്ക് കോസ്റ്റ്ഗാർഡ് എ ൻറോൾഡ് പെർസണൽ ടെസ്റ്റ് വഴിയാണ് (സി.ജി.ഇ.പി.ടി) തെരഞ്ഞെടുപ്പ് നടക്കുക. വിശദവിവരങ്ങളടങ്ങിയ വിജ്ഞാപനം https://joinindiancoastguard.cdac.in/cgept നിന്ന് ഡൗൺലോഡ് ചെയ്യാം.

തസ്തിക, ഒഴിവുകൾ:

നാവിക് (ഡൊമസ്റ്റിക് ബ്രാഞ്ച്)-വിവിധ മേഖലകളിലായി 40 ഒഴിവുകൾ. ദക്ഷിണ മേഖലയിൽ 9 ഒഴിവുകളുണ്ട്. നാവിക് (ജനറൽ ഡ്യൂട്ടി)-വിവിധ മേഖലകളിലായി 260 ഒഴിവുകളുണ്ട്. ദക്ഷി മേഖലയിൽ 54 ഒഴിവുകൾ കേരളം, ലക്ഷദ്വീപ്, ആന്ധ്രപ്രദേശ്, തെലങ്കാന, അന്തമാൻ -നികോബാർ ഐലന്റ്, തമിഴ്‌നാട്, കർണാടക, പുതുച്ചേരി എന്നീ സംസ്ഥാന/കേന്ദ്രഭരണ പ്രദേശങ്ങൾ കോസ്റ്റ്ഗാർഡിന്റെ ദഷിണമേഖലയിൽ പെടുന്നതാണ്. പുരുഷന്മാർക്കാണ് അപേക്ഷിക്കാവുന്നത്.യോഗ്യത: നാവിക് (ജനറൽ ഡ്യൂട്ടി)-മാത്തമറ്റിക്സ്, ഫിസിക്‌സ് വിഷയങ്ങളോടെ പന്ത്രണ്ടാം ക്ലാസ്/പ്ലസ് ടു/തത്തുല്യ ബോർഡ് പരീക്ഷ പാസായിരിക്കണം. നാവിക് (ഡൊമസ്റ്റിക് ബ്രാഞ്ച്)-പത്താംക്ലാസ്/തത്തുല്യ ബോർഡ് പരീക്ഷ പാസായിരിക്കണം. ഓൺലൈൻ അപേക്ഷയിൽ യോഗ്യതയോടൊപ്പം വിഷയങ്ങളും മാർക്കും കാണിച്ചിരിക്കണംപ്രായപരിധി:18-22 വയസ്സ്. 2003 സെപ്റ്റംബർ ഒന്നിനും 2007 ആഗസ്റ്റ് 31നും മധ്യേ ജനിച്ചവരാകണം.

പട്ടികജാതി/വർഗക്കാർക്ക് 5 വർഷവും ഒ.ബി.സി നോൺക്രിമിലയർ വിഭാഗങ്ങൾക്ക് 3 വർഷവും പ്രായപരിധിയിൽ ഇളവുണ്ട്. ഒരാൾക്ക് ഏതെങ്കിലുമൊരു തസ്തികക്ക് മാത്രമേ അപേക്ഷിക്കാൻ കഴിയുള്ളു. അപേക്ഷ/പരീക്ഷ ഫീസ് 300 രൂപയാണ്. പട്ടികവിഭാഗത്തിന് ഫീസില്ല. കമ്പ്യൂട്ടർ അധിഷ്ഠിത ഓൺലൈൻ ടെസ്റ്റ്, കായികക്ഷമത പരീക്ഷ, വൈദ്യപരിശോധന എന്നിവയുടെ അടിസ്ഥാനത്തിൽ മെറിറ്റ് ലിസ്റ്റ് തയാറാക്കിയാണ് നിയമനം. 21700 രൂപയാണ് അടിസ്ഥാന ശമ്പളം.