ഈന്തപ്പഴം-റംസാന്‍ നോമ്പിന് ഒഴിച്ചുകൂടാനാവാത്തത്
- നോമ്പു മുറിയ്ക്കാനുള്ള വിഭവങ്ങളിൽ മുഖ്യമാണ് ഈന്തപ്പഴം. വ്രതാനുഷ്ഠാന വേളയില്‍ എങ്ങനെയാണ് ഇത് പ്രധാന വിഭവമാമാകുന്നത് എന്നറിയാം.
റംസാന്‍ വ്രതാനുഷ്ഠാന നാളുകളാണിത്. പ്രത്യേക അനുഷ്ഠാനങ്ങളിലൂടെയാണ് ഇസ്ലാം വിശ്വാസികൾ ഈ ദിവസങ്ങൾ കടന്നു പോകുന്നത്. ആരോഗ്യകരമായ ഭക്ഷണങ്ങള്‍ ഈ വേളയില്‍ പ്രധാനമാണ്. സൂര്യോദയത്തിന് മുന്‍പും ശേഷവും മാത്രം ഭക്ഷണ, പാനീയങ്ങള്‍ എന്നതാണ് ചിട്ട. ഇതിനാല്‍ തന്നെ ശരീരത്തെ ശക്തിപ്പെടുത്തുന്ന ഭക്ഷണങ്ങളും കഴിയ്ക്കണം. ഇവിടെയാണ് ഈന്തപ്പഴത്തിന്റെ പ്രസക്തി. നോമ്പു മുറിയ്ക്കൽ വിഭവങ്ങളില്‍ മുഖ്യമാണിത്. വ്രതാനുഷ്ഠാന വേളയില്‍ എങ്ങനെയാണ് ഇത് പ്രധാന വിഭവമാകുന്നത് എന്നറിയാം.
ഈന്തപ്പഴം ശരീരത്തിന് ധാരാളം ഊര്‍ജം പ്രദാനം ചെയ്യുന്നതാണ് . ഈന്തപ്പഴത്തിലെ അയേണ്‍, പ്രോട്ടീന്‍, കാല്‍സ്യം, ഫോസ്ഫറസ് തുടങ്ങിയവയടക്കമുള്ള പല വിഭവങ്ങളും ശരീരത്തിന് ആവശ്യമായ ഊര്‍ജം നല്‍കുന്നവയാണ്. വ്രതാനുഷ്ഠാന വേളയില്‍ ശരീരം ക്ഷീണിയ്ക്കുമ്പോള്‍ ഊര്‍ജം നല്‍കുന്ന പ്രധാനപ്പെട്ട ഭക്ഷ്യ വസ്തു. ഇത്തിരി കുഞ്ഞനാണെങ്കിലും ഗുണം പലതരമാണ്. നോമ്പിന്റെ ഘട്ടത്തില്‍ ഇത് ഏറെ അത്യാവശ്യമാണുതാനും. ജലപാനം പോലും ഇല്ലാതെ കഠിനവ്രതം കൈക്കൊള്ളുന്നവരുണ്ട്. ഇത് ശരീരത്തില്‍ ഡീഹൈഡ്രേഷനൊപ്പം ടോക്‌സിനുകള്‍ അടിഞ്ഞ് കൂടാനും ഇടയാക്കുന്നു. ഇതിനുള്ള പരിഹാരം കൂടിയാണ് ഈന്തപ്പഴം. ഈന്തപ്പഴം ശരീരത്തില്‍ നിന്നും ടോക്‌സിനുകള്‍ നീക്കം ചെയ്യാന്‍ സഹായിക്കുന്ന ഒന്നാണ്. ഇതിലെ നാരുകള്‍ ഇതിലെ ടോക്‌സിനുകള്‍ പുറന്തള്ളുന്നവയാണ്. ദഹന പ്രക്രിയയിലൂടെ ശോധന സുഗമമാക്കിയും ഈ ഗുണം നല്‍കുന്നു. ശരീരത്തിന് പ്രതിരോധശേഷി നല്‍കാന്‍ സഹായിക്കുന്ന പോഷകങ്ങള്‍ അടങ്ങിയ ഒന്നു കൂടിയാണ് ഈന്തപ്പഴം.
ബിപി നിയന്ത്രണത്തിന് ഏറെ സഹായിക്കുന്ന ഒന്നാണ് കാരക്ക . പ്രത്യേകിച്ചും ഈ പ്രശ്‌നമുള്ളവര്‍ നോമ്പെടുക്കുമ്പോള്‍ ബിപി പ്രശ്‌നങ്ങളുണ്ടാകാന്‍ സാധ്യതയുണ്ട്. ഇതിനുള്ള നല്ലൊരു പരിഹാരമാണ് ഈന്തപ്പഴം. ഈന്തപ്പഴത്തില്‍ അടങ്ങിയിരിയ്ക്കുന്ന പൊട്ടാസ്യം, മഗ്നീഷ്യം പോലുള്ളവയാണ് ബിപി പ്രശ്‌നങ്ങള്‍ക്കു പരിഹാരമാകുന്നത്. ഇതുപോലെ പ്രമേഹ രോഗികള്‍ക്കും നീണ്ടു നില്‍ക്കുന്ന നോമ്പ് ചിലപ്പോള്‍ ആരോഗ്യപരമായ പ്രശ്‌നങ്ങളുണ്ടാക്കാന്‍ സാധ്യതയേറെയാണ്. സ്വാഭാവിക മധുരത്തിന്റെ ഉറവിടമായ ഈന്തപ്പഴം ഈ പ്രശ്‌നത്തിനുളള നല്ലൊരു പരിഹാരമാണ്.
നോമ്പിന് ശേഷം ഈന്തപ്പഴം കഴിയ്ക്കുന്നത് ഭക്ഷണ കാര്യത്തില്‍ മിതത്വം പാലിയ്ക്കാന്‍ സഹായിക്കുന്നു. ആദ്യം ഈന്തപ്പഴം കഴിയ്ക്കുമ്പോള്‍ വാരി വലിച്ചു കഴിയ്ക്കാനുള്ള തോന്നല്‍ ഒഴിവാക്കുന്നു. ഇതിലെ നാരുകള്‍ വിശപ്പു കുറയ്ക്കുന്നു. വയര്‍ നിറഞ്ഞതായ തോന്നലുണ്ടാക്കുന്നു. വയര്‍ സംബന്ധമായ പ്രശ്‌നങ്ങള്‍ക്കും നല്ലൊരു പരിഹാരം കൂടിയാണ്.
