ഉമ്മൻചാണ്ടിയെപ്പോലെ ഉള്ള വ്യക്തിത്വങ്ങളെ സൃഷ്ടിക്കുകയെന്നതാണ് ഏവരുടെയും ഉത്തരവാദിത്വമെന്ന് രാഹുൽ ഗാന്ധി
- 21 വർഷത്തെ തൻ്റെ രാഷ്ട്രീയ ജീവിതത്തിൽ ഇത്രമാത്രം തന്നെ സ്വാധീനിച്ച മറ്റൊരു നേതാവില്ലെന്നും രാഹുൽ പറഞ്ഞു
കോട്ടയം:ജനങ്ങൾക്ക് വേണ്ടി ജീവിച്ച് സ്വയം ജീവിതം ഹോമിച്ച വ്യക്തിയാണ് ഉമ്മൻചാണ്ടിയെന്ന് രാഹുൽഗാന്ധി. കോട്ടയത്ത് പുതുപ്പള്ളി പള്ളിയിൽ മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമ വാർഷിക അനുസ്‌മരണ സമ്മേളനവും വിവിധ ജീവകാരുണ്യ പ്രവർത്തനങ്ങളുടെ ഉദ്ഘാടനവും നിർവഹിച്ച് സംസാരിക്കുകയായിരുന്നു അദ്ദേഹം.
21 വർഷത്തെ തൻ്റെ രാഷ്ട്രീയ ജീവിതത്തിൽ ഇത്രമാത്രം തന്നെ സ്വാധീനിച്ച മറ്റൊരു നേതാവില്ലെന്നും രാഹുൽ പറഞ്ഞു. ഒരിക്കലും ന്യായീകരിക്കാൻ കഴിയാത്ത വിധത്തിൽ ക്രിമിനൽ രാഷ്ട്രീയ ആക്രമണത്തിന് ഇരയായ വ്യക്തിയായിരുന്നു ഉമ്മൻ ചാണ്ടി. എന്നിട്ടും ഒരിക്കലും ഒരു മോശം പരാമർശം ഉമ്മൻചാണ്ടി ഇതേക്കുറിച്ച് നടത്തിയിട്ടില്ല. പല അർഥത്തിലും തന്റെ ഗുരുവായ ഉമ്മൻചാണ്ടി, നന്മയുടെ സന്ദേശം കൈമാറി പലരുടെയും ഗുരുവായി മാറി.ഉമ്മൻചാണ്ടിയെപ്പോലെ ഉള്ള വ്യക്തിത്വങ്ങളെ സൃഷ്ടിക്കുകയെന്നതാണ് ഏവരുടെയും ഉത്തരവാദിത്വമെന്നും രാഹുൽ ഗാന്ധി പറഞ്ഞു.
