എയർ അറേബ്യ യാംബു സർവിസ് വീണ്ടും ആരംഭിക്കുന്നു

• നവംബർ 28 മുതൽ സർവീസ് ആരംഭിയ്ക്കും

യാംബു: യാംബുവിനും ഷാർജക്കുമിടയിലുള്ള വിമാന സർവിസുകൾ പുനരാരംഭിക്കാനൊരുങ്ങി എയർ അറേബ്യ. മലയാളികളടക്കമുള്ള യാംബുവിലെ ഇന്ത്യൻ പ്രവാസികൾ നാട്ടിലെത്താൻ കൂടുതൽ ആശ്രയിച്ചിരുന്ന ബജറ്റ് എയർലൈനായ എയർ അറേബ്യ ഒരു വർഷം മുമ്പാണ് ചില സാങ്കേതിക കാരണങ്ങളാൽ ഈ റൂട്ടിലെ സർവിസ് നിർത്തിയത്. തിങ്കൾ, ബുധൻ, ശനി ദിവസങ്ങളിലായിരുന്നു മുൻപ് സർവിസ്. ഇത് നിർത്തിയത് ഈ റൂട്ടിലെ യാത്രക്കാർക്ക് ഇരുട്ടടിയായിരുന്നു.

ഖത്തർ എയർവേയ്‌സ് ഈ റൂട്ടിൽ കഴിഞ്ഞ ഡിസംബറിൽ സർവിസ് ആരംഭിച്ച പശ്ചാത്തലത്തിൽ സർവിസ് ഷെഡ്യൂളുകളിൽ മാറ്റം വേണമെന്ന എയർപോർട്ട് അതോറിറ്റിയുടെ നിർദേശം പാലിക്കാൻ പറ്റാതെ വന്നപ്പോഴാണ് എയർ അറേബ്യ സർവിസ് താൽക്കാലികമായി നിർത്തിവെച്ചത്. പുനരാരംഭിക്കുമ്പോൾ ആഴ്ചയിൽ രണ്ട്-സർവിസായിരിക്കും. വ്യാഴം, ശനി ദിവസങ്ങളിൽ രാവിലെ 9.45ന് ഷാർജയിൽനിന്ന് പുറപ്പെട്ട് രാവിലെ 11.55ന് യാംബുവിലും തിരികെ ഉച്ചക്ക് 12.55ന് പുറപ്പെട്ട് വൈകീട്ട് 4.25ന് ഷാർജയിലും എത്തുംവിധമാണ് സർവിസ് ക്രമീകരണം.
കണക്ഷൻ വിമാനങ്ങൾ വഴിയാണെങ്കിലും യാംബുവിൽനിന്ന് കോഴിക്കോട്ടേക്കും കൊച്ചിയിലേക്കുമൊക്കെ എയർ അറേബ്യ സർവിസുണ്ടാകും എന്നതാണ് ഈ മേഖലയിലെ മലയാളി യാത്രക്കാർക്കുള്ള ഗുണം . ബജറ്റ് എയർലൈൻ ആയതിനാൽ ടികെറ്റ് വിലയും കുറവാണെന്നതാണ് മറ്റൊരു ഗുണം.