കളമശ്ശേരിയിൽ ആശങ്ക പരത്തി മഞ്ഞപ്പിത്ത വ്യാപനം

• രണ്ടുപേരുടെ നില ഗുരുതരം

കൊച്ചി:കളമശ്ശേരിയിൽ മഞ്ഞപ്പിത്ത വ്യാപനം കൂടുന്നു . രണ്ടുപേരുടെ നില ഗുരുതരമാണ്. ഇതുവരെ 36 പേർക്കാണ് രോഗം റിപ്പോർട്ട് ചെയ്തത് . നേരത്തെ ഗുരുതരാവസ്ഥയിലായിരുന്ന കുട്ടിയെ വാർഡിലേക്ക് മാറ്റിയിട്ടുണ്ട്. രോഗ ലക്ഷണങ്ങൾ ഉണ്ടായിരുന്നവരെക്കൂടാതെ കഴിഞ്ഞ ദിവസം നടത്തിയ ക്യാമ്പിൽ ഏഴ് പേർക്ക് കൂടി രോഗം സ്ഥിരീകരിച്ചു.

കളമശ്ശേരി നഗരസഭയിലെ 10,12, 14 വാർഡുകളിലായി 13 പേർക്കാണ് നേരത്തെ മഞ്ഞപ്പിത്തം റിപ്പോർട്ട് ചെയ്തത്. മുപ്പതിലധികംപേർ രോഗലക്ഷണങ്ങളുമായി നിരീക്ഷണത്തിലായിരുന്നു. തുടർന്ന് നടത്തിയ വ്യാപക പരിശോധനയിലും നിരീക്ഷണത്തിലുമാണ് കൂടുതൽ പേർക്ക് രോഗം സ്ഥിരീകരിച്ചത്.