കുറ്റ്യാടി ബൈപാസ് പ്രവൃത്തി വൈകുന്നു
- സ്ഥലം ഉടമകൾക്ക് നഷട പരിഹാരത്തുക നൽകാത്തത് തടസ്സം
കുറ്റ്യാടി: കുറ്റ്യാടി ടൗണിലെ ഗതാഗതക്കുരുക്കിന് പരിഹാരമാവുന്ന ബൈപാസ് നിർമാണം വൈകുന്നു . കഴിഞ്ഞ സെപ്റ്റംബർ 30ന് പൊതുമരാമത്ത് മന്ത്രി പി.എ. മുഹമ്മദ് റിയാസാണ് പ്രവൃത്തി ഉദ്ഘാടനം ചെയ്തത് . റോഡിന് വേണ്ടി സ്ഥലം വിട്ടുകൊടുക്കുന്ന വർക്ക് നഷ്ടപരിഹാരത്തുക നൽകാത്തതാണ് പ്രവൃത്തി തുടങ്ങാൻ തടസ്സമെന്ന് പറയുന്നു. നഷ്ടപരിഹാരത്തുക കിട്ടാതെ തന്നെ ചില ഉടമകൾ പ്രവൃത്തിക്ക് സ്ഥലം വിട്ടു നൽകാൻ തയാറാണെങ്കിൽ ചിലർക്ക് സമ്മതമില്ലാത്തതാണ് കരാറുകാരന് പ്രവൃത്തി തുടങ്ങാൻ തടസ്സമെന്ന് പറയുന്നു.
ബൈപാസ് നിർമിക്കുന്നത് കിഫ്ബി ഫണ്ടിൽ 39.42 കോടി രൂപ ചെലവിലാണ്. ഇതിൽ സ്ഥലം ഉടമകൾക്ക് 13.5 കോടി രൂപ നൽകേണ്ടതാണ്. ഈ തുക കഴിഞ്ഞ ഒക്ടോബർ പകുതിയിൽ ലാൻഡ് അക്വിസിഷൻ തഹസിൽദാർക്ക് കൈമാറിയതാണ്. കുറ്റ്യാടി ജുമാമസ്‌ജിദിൻ്റെ സ്ഥലത്തിനടക്കം 96 പേർക്കാണ് തുക നൽകേണ്ടത്. തുക ഉടമകൾക്ക് നൽകാനുള്ള നടപടികൾ യുദ്ധകാലാടിസ്ഥാനത്തിൽ നടക്കുന്നതായും അന്ന് കെ.പി. കുഞ്ഞമ്മദ്കുട്ടി എം.എൽ.എ അറിയിച്ചിരുന്നു.
എന്നാൽ, മാസം അവസാനത്തോടെ പണം നൽകാൻ കഴിയുമെന്നാണ് പറയുന്നത്. ഒന്നര കിലോമീറ്റർ ദൂരമുള്ള റോഡ് തടസ്സമില്ലാതെ തുടങ്ങി പൂർത്തിയാക്കണമെന്നാണ് കരാറുകാരായ ബാബ് കൺസ്ട്രക്ഷൻ്റെ ആഗ്രഹം. സ്ഥലം മുഴുവനായും വിട്ടുകിട്ടിയില്ലെങ്കിൽ ആ ഭാഗങ്ങൾ ഒഴിവാക്കേണ്ടി വരും. കോൺക്രീറ്റ് മിക്സിങ്ങിനുള്ള സംവിധാനങ്ങളടക്കം ഒരുക്കി പ്രവൃത്തി ആരംഭിക്കാൻ കാത്തിരിക്കുകയാണ്.
