ഗതാഗത നിയമലംഘന പിഴ ; ഇനി തവണകളായി ഒടുക്കാം
- ഗതാഗതവകുപ്പിലെ പുതിയ പരിഷ്കാരങ്ങളുടെ ഭാഗമായാണ് സംവിധാനം വരുന്നത്
തിരുവനന്തപുരം : നിയമലംഘനങ്ങൾക്കുള്ള പിഴ തവണകളായി അടയ്ക്കാൻ സംവിധാനമൊരുങ്ങുന്നു. ഗതാഗതവകുപ്പിലെ പുതിയ പരിഷ്കാരങ്ങളുടെ ഭാഗമായാണ് സംവിധാനം ഒരുങ്ങുന്നത്. വിവിധ കുറ്റങ്ങളിലായി 200, 500, 1000, 5000 എന്നീ പിഴകളുണ്ടെങ്കിൽ ഇതെല്ലാം കൂടി ഒന്നിച്ച് 6,700 രൂപ അടയ്ക്കണമെന്നതാണ് നിലവിലെ രീതി.സാധാരണ വരുമാനക്കാർക്കും തൊഴിലാളികൾക്കും ഇത് പലപ്പോഴും ഒന്നിച്ചുനൽകാനാകാതെ പിഴയടയ്ക്കൽ നീളുന്നുണ്ട്. ഈ പ്രശ്നം പരിഹരിക്കുന്നതിനാണ് പുതിയ സംവിധാനം കൊണ്ടുവരുന്നത്.
പിഴ തവണകളായി സ്വീകരിക്കുന്നതുമായി ബന്ധപ്പെട്ട സാങ്കേതികജോലികളും സോഫ്റ്റ് വേർ പുതുക്കലും നടന്നുവരികയാണ്.ഇതു പൂർത്തിയായാലുടൻ തവണകളായി പിഴ സ്വീകരിച്ചുതുടങ്ങും. അധികം വൈകാതെ സംവിധാനം നിലവിൽവരുമെന്ന് ഗതാഗതവകുപ്പിലെ ഉന്നത ഉദ്യോഗസ്ഥർ അറിയിച്ചു.തെറ്റായ പാർക്കിങ്, അമിതവേഗം, അശ്രദ്ധയോടെ ഡ്രൈവിങ്, യൂണിഫോം ധരിക്കാതെയുള്ള ടാക്സി ഡ്രൈവിങ്, എയർഹോൺ മുഴക്കൽ, രാത്രികാലങ്ങളിൽ ലൈറ്റ് ഡിമ്മും ബ്രൈറ്റും ചെയ്യാതിരിക്കൽ എന്നീ കുറ്റങ്ങൾക്ക് വ്യത്യസ്‌ത പിഴകളുണ്ട്. നിലവിൽ ഇവയിൽ മൂന്നോ നാലോ കുറ്റങ്ങൾ വന്നെങ്കിൽ അതെല്ലാം ഒന്നിച്ച് പലരും അടയ്ക്കുന്നില്ലെന്നും വകുപ്പ് കണ്ടെത്തിയതിന് പിന്നാലെയാണ് പുതിയ നടപടി.
