ഗ്യാസ് ഏജൻസി മാറ്റം; നട്ടം തിരിഞ്ഞ് ഉപഭോക്താക്കൾ
- ഉപഭോക്താക്കളെ അറിയിക്കാതെയുള്ള മാറ്റത്തിനെതിരെ ജനരോഷം ശക്തം.
- പേരാമ്പ്ര ധീര ഏജൻസിയുടെ ഉപഭോക്താക്കളെയാണ് കുറ്റ്യാടിയിലെ മരുതോങ്കര വജ്ര ഏജൻസിയിലേക്ക് മാറ്റിയത്.
പാലേരി: പേരാമ്പ്രയിൽ നിന്നും കുറ്റ്യാടിയിലേക്ക് ഗാർഹിക പാചക വാതക കണക്ഷൻ മാറ്റിയത് ഉപഭോക്താക്കളെ ബുദ്ധിമുട്ടിലാക്കി. ചങ്ങരോത്ത് പഞ്ചായത്തിലെ 2500 ഓളം ഗ്യാസ് കണക്ഷനുകളാണ് പേരാമ്പ്രയ്ക്ക് മാറ്റിയത്. പേരാമ്പ്ര ഐഒസിയുടെ ധീര പാചക വാതക ഏജൻസിയുടെ ഉപഭോക്താക്കളെയാണ് കുറ്റ്യാടി മരുതോങ്കരയിലെ അടുക്കത്തുള്ള വജ്ര ഏജൻസിയിലേക്ക് മാറ്റിയത്.
മുമ്പ് ആഴ്ചയിൽ രണ്ട് തവണ സ്ഥിരമായി വന്നു കൊണ്ടിരുന്ന റൂട്ടിൽ ആഴ്‌ചകളോളമായിട്ടും ഒരു തവണ പോലും വിതരണം നടക്കുന്നില്ലെന്ന് ഉപഭോക്താക്കൾ പരാതിപ്പെട്ടു. കടിയങ്ങാട് നിന്നും പേരാമ്പ്രയിലേക്ക് ആറു കിലോമീറ്റർ ദൂരമാണ് ഉള്ളത് . എന്നാൽ, ഇപ്പോഴുള്ള ഏജൻസിയിലേക്ക് 11 കിലോമീറ്റർ ദൂരമുണ്ട്. ഉപഭോക്താക്കളെ അറിയിക്കാതെയുള്ള മാറ്റത്തിനെതിരെ ശക്തമായ ജനരോഷമുണ്ട്. ദൂരം വർധിക്കുമ്പോൾ ആനുപാതികമായി ചാർജും വർധിക്കും.
ഗ്യാസ് ഏജൻസിയിൽ മതിയായ ജോലിക്കാരെ നിയമിക്കാത്തതും വിതരണത്തിന് ആവശ്യത്തിന് വാഹനമില്ലാത്തതും ജോലിക്കാർക്ക് സ്ഥലപരിചയമില്ലാത്തതും കാരണം ബുക്ക് ചെയ്തവർക്ക് സമയബന്ധിതമായി സിലിണ്ടർ ലഭിക്കുന്നില്ല. ഒരു സിലിണ്ടർ മാത്രം ഉള്ളവർക്കാണ് ഏറെ ദുരിതം അനുഭവിക്കുന്നത്. പ്രതിസന്ധി പരിഹരിക്കാൻ അധികൃതർ കാര്യക്ഷമമായ നടപടി സ്വീകരിക്കണമെന്ന് ഗുണഭോക്താക്കൾ പറയുന്നു.
