ചേമഞ്ചേരി സ്വാതന്ത്ര്യ സ്മാരക സ്തൂപം ഉടൻ പുന:സ്ഥാപിക്കണം

• എൻ.എച്ച് വികസനത്തിൻ്റെ പേരിൽ സ്മാരകം പൊളിച്ചുമാറ്റിയിട്ട് രണ്ടു വർഷം കഴിഞ്ഞു

കൊയിലാണ്ടി: സ്വാതന്ത്ര്യ സമര പ്രവർത്തനങ്ങൾക്ക് നേതൃത്വം നൽകിയവരുടെ സ്മരണാർഥം ചേമഞ്ചേരിൽ ദേശീയപാതക്കരികിൽ നിർമിച്ച രക്തസാക്ഷി സ്തൂപം പുനർ നിർമിക്കണമെന്ന ആവശ്യം ശക്തമാവുന്നു. റോഡ് വികസനത്തിൻ്റെ പേരിൽ സ്മാരകം പൊളിച്ചുമാറ്റിയിട്ട് രണ്ടു വർഷം കഴിഞ്ഞിട്ടും സ്മാരകം പുതുക്കി നിർമിക്കാത്തതിൽ നാട്ടുകാരുടെ പ്രതിഷേധം ശക്തമാണ്.

കാഞ്ഞിരക്കണ്ടി ചാത്തുക്കുട്ടി ചെട്ടിയാർ സൗജന്യമായി നൽകിയ സ്ഥലത്ത് ചിത്രകാരനായ യു.കെ. രാഘവൻ മാസ്റ്ററായിരുന്നു സ്‌തൂപം രൂപകൽപന ചെയ്തത്. തുടർന്ന് പഞ്ചായത്ത് പണം മുടക്കി ഇത് നിർമിക്കുകയും ചെയ്തു.
കാരോളി അപ്പുനായർ, യു.കെ. കൃഷ്ണൻ നായർ, തറയിൽ ഉണ്ണി നായർ, കാരോളി ഉണ്ണി നായർ, കെ.വി. മാധവൻ കിടാവ്, കുറത്തിശാല മാധവൻ നായർ എന്നിവരായിരുന്നു അന്നത്തെ പ്രധാന സ്വാതന്ത്ര്യ സമര നേതാക്കൾ. സ്വതന്ത്ര ഭാരതം എന്ന പത്രം പ്രചരിപ്പിക്കുകയും ചെയ്തു. ഇവർ അറസ്റ്റ് ചെയ്യപ്പെടുകയും ജയിൽവാസം അനുഭവിക്കുകയും ചെയ്തു. ജയിൽവാസകാലത്ത് ക്രൂര മർദനമാണ് ഇവർ നേരിട്ടത്. അവർക്കുള്ള ആദരമായാണ് ചേമഞ്ചേരിയിൽ സ്തൂ‌പം പണിതത്.

സ്തൂ‌പം പൊളിക്കുമ്പോൾ, പുതുതായി നിർമിച്ച രജിസ്ട്രാർ ഓഫിസ് പരിസരത്ത് സ്തൂപം ഉടൻ നിർമിക്കുമെന്ന് പറഞ്ഞിരുന്നു. എന്നാൽ, ഇതുവരെയും നടപ്പായില്ല. സ്വാതന്ത്ര്യസമര സേനാനികളോടുള്ള അനാദരവാണിതെന്നും പരാതി ഉയരുന്നുണ്ട്.