നാളെ പുലർച്ചെ മുതൽ സംസ്ഥാനത്ത് ശക്തമായ കടലാക്രമണത്തിന് സാധ്യത

• ഒക്ടോബർ 15 ചൊവ്വാഴ്‌ച പുലർച്ചെ 5.30 മുതൽ 16ന് രാത്രി 11.30 വരെയാണ് ജാഗ്രതാ നിർദേശം ഉള്ളത്

തിരുവനന്തപുരം: കേരള തീരത്ത് ഒക്ടോബർ 15നും 16നും കടലാക്രമണത്തിന് സാധ്യത. ദേശീയ സമുദ്രസ്ഥിതിപഠന ഗവേഷണ കേന്ദ്രത്തിന്റേതാണ് അറിയിപ്പ്. കേരള തീരത്ത് റെഡ് അലർട്ട് ആണ് ഐഎൻസിഒഐഎസ് പ്രഖ്യാപിച്ചിരിക്കുന്നത്. ഒക്ടോബർ 15 ചൊവ്വാഴ്‌ച പുലർച്ചെ 5.30 മുതൽ 16ന് രാത്രി 11.30 വരെയാണ് ജാഗ്രതാ നിർദേശം ഉള്ളത്.

ഒന്നു മുതൽ രണ്ട് മീറ്റർ വരെ ഉയർന്ന തിരമാലയ്ക്കും കള്ളക്കടൽ പ്രതിഭാസത്തിനും സാധ്യതയുണ്ടെന്നാണ് അറിയിപ്പിലുള്ളത്. തമിഴ്നാട്ടിലെ തൂത്തുക്കുടി കന്യാകുമാരി, തീരങ്ങളിലും ലക്ഷദ്വീപ്, മാഹി, കർണാടക തീരങ്ങളിലും ഉയർന്ന തിരമാലയ്ക്കും കള്ളക്കടൽ പ്രതിഭാസത്തിനും ജാഗ്രത മുന്നറിയിപ്പ് നൽകിയിട്ടുണ്ട്.