പ്രതിഷേധത്തിലുള്ള ഡോക്ടർമാർ ജോലിയിൽ പ്രവേശിക്കണം- സുപ്രീംകോടതി

• രാജ്യത്തെ പാവപ്പെട്ട ജനങ്ങൾ ബുദ്ധിമുട്ട് നേരിടുന്നതിനാലാണ് എല്ലാ ഡോക്ടർമാരോടും തിരികെ ജോലിയിൽ പ്രവേശിക്കാൻ ആവശ്യപ്പെട്ടത്

ന്യൂഡൽഹി : ആർ ജി കർ മെഡിക്കൽ കോളേജിൽ ജൂനിയർ ഡോക്ടർ ക്രൂരപീഡനത്തിന് ഇരയായി കൊല്ലപ്പെട്ട സംഭവത്തിൽ പ്രതിഷേധിച്ച് സേവനങ്ങൾ നിർത്തിവെച്ച എല്ലാ ഡോക്ടർമാരും തിരികെ ജോലിയിൽ പ്രവേശിക്കണമെന്ന് സുപ്രീംകോടതി. രാജ്യത്തെ പാവപ്പെട്ട ജനങ്ങൾ ബുദ്ധിമുട്ട് നേരിടുന്നതിനാലാണ് എല്ലാ ഡോക്ടർമാരോടും തിരികെ ജോലിയിൽ പ്രവേശിക്കാൻ ആവശ്യപ്പെട്ടത്.

ഡോക്ടറുടെ കൊലപാതകത്തെ സംബന്ധിച്ചുള്ള ഹർജികൾ ചീഫ് ജസ്റ്റിസ് ഡിവൈ ചന്ദ്രചൂഡ്, ജസ്റ്റിസ് ജെ ബി പർദിവാല, ജസ്റ്റിസ് മനോജ് മിശ്ര എന്നിവരടങ്ങിയ ബെഞ്ച് പരിഗണിക്കവെയാണ് സേവനങ്ങൾ പുനരാരംഭിക്കാൻ ഡോക്ടർമാർക്ക് നിർദേശം നൽകിയത്. പ്രതിഷേധം കാരണം ഹർജി പരിഗണിക്കുമ്പോൾ ഡോക്ടേഴ്സ് ഹാജരായില്ല. ജോലിയിൽ പ്രവേശിക്കേണ്ടതുണ്ടെന്നും അവർക്കെതിരെ ആരും നടപടിയെടുക്കില്ലെന്നും കോടതി ഉറപ്പ് നൽകി.