പ്ലാസ്റ്റിക് കുപ്പിയ്ക്ക് വിട ;ഹരിത കുപ്പിവെള്ളവുമായി കേരളം
- ‘ഹില്ലി അക്വാ’ ബ്രാൻഡിനു കീഴിലാണ് ഹരിത കുപ്പിവെള്ളവും വിപണിയിലെത്തുക
തിരുവനന്തപുരം: പ്ലാസ്റ്റിക്ക് കുപ്പികൾക്ക് ബദലായി ജൈവ ഹരിത കുപ്പികൾ (കംപോസ്റ്റബിൾ ബോട്ടിൽ) വിപണിയിൽ ഇറക്കാനൊക്കാനൊരുങ്ങി കേരളം. സർക്കാർ പുറത്തിറക്കുന്ന ‘ഹില്ലി അക്വാ’ ബ്രാൻഡിനു കീഴിലാണ് ഹരിത കുപ്പിവെള്ളവും വിപണിയിലേക്ക് എത്തുന്നത്. കുപ്പിവെള്ളത്തിന്റെ ഉദ്ഘാടനം ജനുവരിയിൽ മുഖ്യമന്ത്രി പിണറായി വിജയൻ നിർവഹിക്കും.ജലസേചന വകുപ്പിനു കീഴിലുള്ള കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്മെന്റ് കോർപറേഷനാണ് (കെ.ഐ.ഐ.ഡി.സി.- കിഡ്‌ക്) നിർമാണ ചുമതല. ജലസേചന വകുപ്പ് മന്ത്രി റോഷി അഗസ്റ്റിനാണ് പദ്ധതി വിഭാവനം ചെയ്തത്.
2019-ൽ മുംബൈയിൽ നടന്ന എക്സിബിഷനിൽ ഗ്രീൻ ബയോ പ്രോഡക്ടസ് വികസിപ്പിച്ച കംപോസ്റ്റബിൾ ബോട്ടിലിനെക്കുറിച്ചുള്ള വാർത്ത മന്ത്രിയുടെ ശ്രദ്ധയിൽപ്പെടുകയും നിർമാതാക്കളെ കേരളത്തിലേക്ക് ക്ഷണിക്കുകയുമായിരുന്നു. പദ്ധതി നടപ്പാകുന്നതോടെ രാജ്യത്ത് ആദ്യമായി ഒരു സംസ്ഥാനം ജൈവ കുപ്പികളിൽ വെള്ളം വിപണനം ചെയ്യുന്ന സംസ്ഥാനം എന്ന പേരും കേരളത്തിന് സ്വന്തമാകും.നൂറു ശതമാനവും ജൈവ ഉന്മൂലനം സാധ്യമാകുന്ന ഇത്തരം കുപ്പികൾ കാഴ്ചയിൽ പ്ലാസ്റ്റിക്ക് കുപ്പികളെ പോലെ ഉണ്ടാകും.ഹരിതകുപ്പികൾ നിർമിക്കാൻ ഉപയോഗിക്കുന്ന അസംസ്കൃത വസ്‌തുക്കൾക്ക് കേന്ദ്ര മലിനീകരണ നിയന്ത്രണ ബോർഡിന്റെ അംഗീകാരത്തിനു പുറമെ ഐഎസ്ഒ (ISO17088), ടിയുവി (TUV) തുടങ്ങിയ ദേശീയ അന്തർദേശീയ സർട്ടിഫിക്കേഷനും ലഭിച്ചിട്ടുണ്ട്.കേരളം ആസ്ഥാനമായി പ്രവർത്തിക്കുന്ന എയ്‌റ്റ് സ്പെഷ്യലിസ്റ്റ് സർവീസസ് എന്ന സ്റ്റാർട്ടപ്പിന്റെ ഉപവിഭാഗമായ ഗ്രീൻ ബയോ പ്രോഡക്ടസാണ് കംപോസ്റ്റബിൾ ബോട്ടിലുകൾ നിർമിക്കുന്നതിന് ആവിശ്യമായ അസംസ്കൃത വസ്തുക്കൾ നൽകുന്നത്.
