യുഎഇ പൊതുമാപ്പ്; അവസാന തീയതി ഡിസംബർ 31 വരെ
- പൊതുമാപ്പ് സേവനങ്ങൾ ഉടൻ ഉപയോഗപ്പെടുത്തണമെന്ന് ജിഡിആർഎഫ്എ
ദുബായ് :യുഎഇയിലെ പൊതുമാപ്പ് പദ്ധതിയുടെ കാലാവധി ഈ വർഷം ഡിസംബർ 31ന് അവസാനിക്കാനിരിക്കെ വിസ നിയമങ്ങൾ ലംഘിച്ച് കഴിയുന്നവർ നിയമപരമായ കൃത്യമായ നടപടികൾ പൂർത്തിയാക്കാൻ പൊതുമാപ്പ് സേവനങ്ങൾ ഉടൻ ഉപയോഗപ്പെടുത്തണമെന്ന് ജിഡിആർഎഫ്എ .2024 സെപ്റ്റംബർ 1ന് ആരംഭിച്ച പൊതുമാപ്പ് പദ്ധതി, ഒക്ടോബർ 31ന് അവസാനിക്കേണ്ടതായിരുന്നു. സേവനം തേടുന്നവരുടെ വർധിച്ചെത്തിയ എണ്ണം കണക്കിലെടുത്ത് ഇത് ഡിസംബർ 31 വരെ നീട്ടി. പൊതുമാപ്പ് പദ്ധതിയുടെ പ്രയോജനം ഉപയോഗപ്പെടുത്താൻ വേഗം നടപടി ആരംഭിക്കണമെന്ന് ഡയറക്ടറേറ്റ് നിർദ്ദേശിച്ചു. യുഎഇയിൽ ദീർഘകാലമായി രേഖകളില്ലാതെ കഴിയുന്നവർക്ക് താമസം നിയമപരമാക്കാനുള്ള അവസരമാണ് പൊതുമാപ്പ് പദ്ധതി.
അതേ സമയം, പൊതുമാപ്പ് സേവനങ്ങൾ തേടുന്ന കുടുംബങ്ങൾക്കും കുട്ടികൾക്കും ആശ്വാസകരമായ അനുഭവം നൽകുന്നതിനായി ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ്, അൽ അവീറിലെ പൊതുമാപ്പ് ടെന്റിൽ കുട്ടികൾക്കായി പ്രത്യേക കളിസ്ഥലം തുറന്നു.
