രാജ്യാന്തര ഫുട്ബോളിലെ ഹാട്രിക് നേട്ടത്തിൽ റൊണാൾഡോയ്ക്കൊപ്പം മെസ്സിയും
- 10 തവണയാണ് ഇരുവരും അന്താരാഷ്ട്ര മത്സരങ്ങളിൽ ഹാട്രിക് നേടിയത്
2026 ഫിഫ ലോകകപ്പ് ലാറ്റിനമേരിക്കൻ യോഗ്യതാ മത്സരത്തിൽ ഹാട്രിക് നേടിയതോടെ രാജ്യാന്തര ഫുട്ബോളിലെ ഹാട്രിക് നേട്ടത്തിൽ ക്രിസ്റ്റ്യാനോ റൊണാൾഡോയ്ക്ക് ഒപ്പമെത്തിയിരിക്കുകയാണ് ലയണൽ മെസ്സിയും . 10 തവണയാണ് ഇരുവരും അന്താരാഷ്ട്ര മത്സരങ്ങളിൽ ഹാട്രിക് നേടിയത്.
ക്രിസ്റ്റ്യാനോ റൊണാൾഡോയും ലയണൽ മെസ്സിയും മാത്രമാണ് രാജ്യാന്തര മത്സരങ്ങളിൽ 10 ഹാട്രിക് നേടിയ രണ്ട് താരങ്ങൾ. ബൊളീവിയയ്ക്കെതിരായ മത്സരത്തിൽ 19-ാം മിനിറ്റിൽ ലയണൽ മെസ്സിയിലൂടെ അർജൻ്റീന ആദ്യ ഗോൾ നേടി. ബൊളീവിയയുടെ പ്രതിരോധത്തിലെ പിഴവ് മുതലെടുത്ത മെസ്സി തകർപ്പൻ ഫിനിഷിങ്ങിലൂടെ പന്ത് വലയിലാക്കി.മെസ്സിയുടെ അസിസ്റ്റിൽ 43-ാം മിനിറ്റിൽ ലൗത്താരോ മാർട്ടിനെസ് രണ്ടാം ഗോൾ നേടി. പിന്നാലെ ഹൂലിയൻ ആൽവരസിൻ്റെ ഗോളും പിറന്നു. മെസ്സിയായിരുന്നു ഇതിനും അസിസ്റ്റ് നൽകിയത് . ആദ്യ പകുതി പിന്നിട്ടപ്പോൾ തന്നെ അർജന്റീന എതിരില്ലാത്ത മൂന്ന് ഗോളുകൾക്ക് മുന്നിലായിരുന്നു.
രണ്ടാം പകുതിയിലും അർജന്റീന ആദിപത്യം തുടർന്നു. അർജന്റീനയ്ക്കായി 70-ാം മിനിറ്റിൽ തിയാഗോ അൽമാഡ നാലാം ഗോൾ നേടി. പിന്നാലെ 84, 86 മിനിറ്റുകളിലായിരുന്നു മെസ്സി തന്റെ ഹാട്രിക് പൂർത്തിയാക്കിയത്. മത്സരത്തിൽ അർജന്റീനയുടെ വിജയം എതിരില്ലാത്ത ആറ് ഗോളുകൾക്കായിരുന്നു . ഇതോടെ കരിയറിൽ ആകെ 846 ഗോളുകളാണ് മെസ്സി നേടിയിരിക്കുന്നത്. അർജന്റീനയ്ക്കായി 112 ഗോളുകളും 57 അസിസ്റ്റുകളും മെസ്സി സ്വന്തമാക്കി കഴിഞ്ഞു.
