റേഷൻ പഞ്ചസാരയുടെ വില കൂട്ടി

• കിലോഗ്രാമിന് 21 രൂപയുണ്ടായിരുന്നത് 27 രൂപയായി

തിരുവനന്തപുരം:സംസ്ഥാനത്ത് അന്ത്യോദയ അന്നയോജന ഗുണഭോക്താക്കൾക്കുള്ള റേഷൻ പഞ്ചസാരയുടെ വില വർധിപ്പിച്ചു . കിലോഗ്രാമിന് 21 രൂപയുണ്ടായിരുന്നത് 27 രൂപയായി കൂട്ടി. വില കൂട്ടിയതിനൊപ്പം റേഷൻ കടക്കാർക്കുള്ള കമ്മിഷനും വർധിപ്പിച്ചു. ഒരു കിലോഗ്രാം പഞ്ചസാര വിതരണം ചെയ്യുന്നതിന് നിലവിൽ 50 പൈസയാണ് ലഭിച്ചിരുന്നത്. ഇത് ഒരു രൂപയാക്കി കൂട്ടി .

2018 ഓഗസ്റ്റിലാണ് ഇതിനു മുൻപ് റേഷൻ പഞ്ചസാരയുടെ വില വർധിപ്പിച്ചത്. കിലോഗ്രാമിന് 13.5 രൂപയായിരുന്ന വില അന്ന് 21 രൂപയായാണ് വർധിപ്പിച്ചത്. റേഷൻ പഞ്ചസാരയുടെ വിതരണത്തിലൂടെ സർക്കാരിനുണ്ടാകുന്ന പ്രതിവർഷ ബാധ്യത കുറയ്ക്കാൻ വില കിലോഗ്രാമിന് 31 രൂപയാക്കണമെന്നാണ് സപ്ലൈകോ ആവശ്യപ്പെട്ടത്. എന്നാൽ പൊതുവിതരണ ഉപഭോക്തൃകാര്യ കമ്മിഷണർ ആവശ്യപ്പെട്ടത് 25 രൂപയാക്കണമെന്നാണ്. ഇതു രണ്ടും പരിഗണിച്ചാണ് സർക്കാർ 27 രൂപ വില തീരുമാനിച്ചത്.