വിദ്യാർഥികൾക്കായി കരിയർപോർട്ടൽ വരുന്നു

• യുണിസെഫിന്റെ സാമ്പത്തികസഹായത്തോടെ കരിയർ ഗൈഡൻസ് ആൻഡ് അഡോളസെന്റ് കൗൺസിലിങ് സെല്ലാണ് പോർട്ടൽ തയ്യാറാക്കുന്നത്

തിരുവനന്തപുരം :സംസ്ഥാനത്തെ എട്ടാംക്ലാസ് മുതലുള്ള വിദ്യാർഥികൾക്ക് തൊഴിലിലേക്ക് വഴികാട്ടാൻ പൊതുവിദ്യാഭ്യാസവകുപ്പ് സമഗ്ര കരിയർപോർട്ടൽ തയ്യാറാക്കുന്നു. യുണിസെഫിന്റെ സാമ്പത്തികസഹായത്തോടെ കരിയർ ഗൈഡൻസ് ആൻഡ് അഡോളസെന്റ് കൗൺസിലിങ് സെല്ലാണ് പോർട്ടൽ തയ്യാറാക്കുന്നത്.കരിയർ ഗൈഡ് അധ്യാപകരുടെ നേതൃത്വത്തിൽ കേരള ഇൻഫ്രാസ്ട്രക്ച്ചർ ആൻഡ് ടെക്നോളജി (കൈറ്റ്) ഇതിനാവശ്യമായ സോഫ്റ്റ്വേർ തയ്യാറാക്കിത്തുടങ്ങി. ഫെബ്രുവരിയോടെ പ്രവർത്തനക്ഷമാകുമെന്നാണ് പ്രതീക്ഷ. തൊഴിൽമേഖലകളെ 20 വിഭാഗങ്ങളാക്കിത്തിരിച്ച്, 400 ഓളം തൊഴിലുകൾ ഉൾപ്പെടുത്തിയാണ് പോർട്ടൽ തയ്യാറാക്കുന്നത്.

ഓരോ തൊഴിലിലേക്കുമുള്ള പ്രവേശനരീതി, അതിന് തിരഞ്ഞെടുക്കേണ്ട കോഴ്സുകൾ, ആവശ്യമായ നൈപുണി തുടങ്ങിയ വിവരങ്ങൾ ഉൾപ്പെടുത്തും. സ്കോളർഷിപ്പ് സാധ്യതകളുടെ വിശദാംശങ്ങളും ഉണ്ടാവും.വിദ്യാർഥികൾക്കും രക്ഷിതാക്കൾക്കും ലോഗിൻചെയ്ത് ഉപയോഗിക്കാനാവും വിധമാവും പ്രവർത്തനമെന്ന് അധികൃതർ പറഞ്ഞു.ഹൈസ്കൂൾതലംമുതലേ കുട്ടികൾക്ക് അവരുടെ ഇഷ്ടപ്പെട്ട തൊഴിലിനെക്കുറിച്ച് അറിവുനൽകുകയും അതിലേക്ക് നയിക്കുകയുമാണ് ലക്ഷ്യം. പത്താംക്ലാസ് കഴിഞ്ഞാൽ തൊഴിലിനനുബന്ധമായ ഹയർസെക്കൻഡറി, ബിരുദകോഴ്സുകൾ ഏതാണെന്ന് മനസ്സിലാക്കി അത് തിരഞ്ഞെടുക്കാനും പോർട്ടൽ സഹായിക്കും.