സന്തോഷ് ട്രോഫി; കേരളം- ബംഗാൾ ഫൈനൽ ഇന്ന്

• 8-ാം കിരീടം ലക്ഷ്യമാക്കി കേരളം

സന്തോഷ് ട്രോഫി ഫൈനലിൽ ഇന്ന് കേരളം ബംഗാളിനെ നേരിടും. ഗച്ചിബൗളി സ്റ്റേഡിയത്തിൽ രാത്രി 7.30- നാണ് കിരീടപ്പോരാട്ടം.കേരളം 16-ാം ഫൈനലിനാണ് ഇറങ്ങുന്നത്. ബംഗാളിനാവട്ടെ 47-ാം കലാശപ്പോരാണ്. ബംഗാളിന്റെ അക്കൗണ്ടിൽ 32 കിരീടമുണ്ട്. കേരളത്തിന് ഏഴു വിജയങ്ങളും. ഇത്തവണ അപരാജിതരായിട്ടാണ് കേരളം ഫൈനൽ കളിക്കാനിറങ്ങുന്നത്.പ്രതിരോധതാരം എം. മനോജിനു സെമിയിൽ റെഡ് കാർഡ് കിട്ടിയതാണ് കേരളത്തിനു തിരിച്ചടിയായത്. ഫൈനലിൽ ക്യാപ്റ്റൻ ജി. സഞ്ജുവിനൊപ്പം മനോജിന്റെ അഭാവം എങ്ങനെയുണ്ടാകുമെന്ന് കണ്ടറിയണം.

കൊൽക്കത്ത ലീഗ് കളിച്ച മനോജിന് ബംഗാളിനെ കൃത്യമായി അറിയാം. പകരം മറ്റൊരു കൊൽക്കത്ത ലീഗ് താരം ആദിൽ അമൽ വരാനാണ് സാധ്യത.സെമിയിൽ പകരക്കാരനായി ഇറങ്ങി ഹാട്രിക് നേടിയ പി.പി. മുഹമ്മദ് റോഷൽ രണ്ടാം പകുതിയിൽ തന്നെയാവും ഇറങ്ങുക. 5-4-1 എന്നതാകും ടീം ശൈലി. അജ്സൽ ഏക സ്ട്രൈക്കറായി കളിക്കും. നസീബ് റഹ്‌മാൻ, ക്രിസ്റ്റി ഡേവിസ്, നിജോ ഗിൽബർട്ട്, മുഹമ്മദ് അഷ്റഫ് എന്നിവരാകും മധ്യനിരയിൽ. നരോ ഹരി ശ്രേഷ്ഠ, റോബി ഹൻസ്ഡ എന്നീ സ്റ്റാർ സ്ട്രൈക്കർമാരാണ് ബംഗാളിന്റെ കുന്തമുനകൾ. പതിവുപോലെ ഇരുവരും തിളങ്ങിയാൽ പിടിച്ചുനിർത്തുക കേരളത്തിനു കഠിനമാകും. പന്ത് തട്ടിയെടുത്ത് കുതിക്കാൻ ഹൻസ്ഡയ്ക്കു പ്രത്യേക കഴിവുണ്ട്. ഇവർക്കൊപ്പം ലെഫ്റ്റ് വിങ്ങർ സുപ്രിയ പണ്ഡിറ്റും ചേർന്നാൽ മുന്നേറ്റത്തിൽ സന്തുലിതമാണ് ബംഗാൾ. 4-3-3 ആണ് ശൈലി.