സുരേഷ് ഗോപി എംപി സ്ഥാനം രാജിവയ്ക്കണം;കെ.മുരളീധരൻ
- സുരേഷ് ഗോപി ഇപ്പോൾ പാർലമെൻ്റിലും ഇല്ല തൃശൂരിലും ഇല്ല.ഫേസ്ബുക്കിൽ മാത്രമാണ് ഉള്ളത്.
കോഴിക്കോട് : തൃശൂർ ലോക്‌സഭ തിരഞ്ഞെടുപ്പിൽ വ്യാജവോട്ട് ആരോപണത്തിൽ കലക്ടർ കൃഷ്‌ണതേജക്ക് പരാതി നൽകിയിട്ടും മൗനം പാലിച്ചുവെന്ന് കോൺഗ്രസ് നേതാവ് കെ മുരളീധരൻ പറഞ്ഞു. വ്യാജവോട്ട് ചെയ്യാനെത്തിയവരെ കോൺഗ്രസ് പ്രവർത്തകർ തടഞ്ഞപ്പോൾ അവർക്ക് വോട്ട് ചെയ്യാൻ അവകാശമുണ്ടെന്ന് പറഞ്ഞ് കലക്ടർ അനുവദിക്കുകയായിരുന്നെന്നും മുരളീധരൻ പറഞ്ഞു.
ധാർമികതയുണ്ടെങ്കിൽ സുരേഷ് ഗോപി എംപി സ്ഥാനം രാജിവയ്ക്കണം. സുരേഷ് ഗോപി ഇപ്പോൾ പാർലമെൻ്റിലും ഇല്ല തൃശൂരിലും ഇല്ല.ഫേസ്ബുക്കിൽ മാത്രമാണ് ഉള്ളത്. പാർലമെന്റിൻറെ ഒരു വിഷ്വൽസിലും സുരേഷ് ഗോപിയെ കാണാനില്ലെന്നും മുരളീധരൻ പരിഹസിച്ചു.
തൃശൂരിലെ വ്യാജവോട്ടിൽ കോൺഗ്രസ് തിരഞ്ഞെടുപ്പ് സമയത്ത് തന്നെ പരാതി നൽകിയിരുന്നു. എന്നാൽ ഒരു നടപടിയും കലക്ടറുടെ ഭാഗത്തുനിന്നുണ്ടായില്ല. ബിജെപിയും കലക്‌ടറും തമ്മിലുള്ള ഡീലാണ് ഉണ്ടായത്. ഇലക്ഷൻ കഴിഞ്ഞതിന് പിന്നാലെ കലക്ടറെ ആന്ധ്ര ഉപമുഖ്യമന്ത്രിയുടെ പ്രൈവറ്റ് സെക്രട്ടറിയായി നിയമിച്ചത് ഡീലിന്റെ ഭാഗമാണെന്നും മുരളീധരൻ മാധ്യമങ്ങളോട് പറഞ്ഞു.
