സൗകര്യങ്ങളില്ല;ദന്താശുപത്രി അടപ്പിച്ചു

• പുറമേരി കുടുംബാരോഗ്യകേന്ദ്രം ഹെൽത്ത് ഇൻസ്പെക്ടർ സുരേന്ദ്രൻ കല്ലേരി, ജെഎച്ച്ഐകെ സന്ദീപ് കുമാർ എന്നിവർ നടത്തിയ പരിശോധനയെത്തുടർന്നാണ് നടപടി

പുറമേരി: പുറമേരിയിൽ ആരോഗ്യ വിഭാഗത്തിന്റെ പരിശോധനയിൽ ദന്താശുപത്രി അടച്ചു. അടിസ്ഥാനസൗകര്യങ്ങൾ ഇല്ലാതെയും പഞ്ചായത്തിന്റെ അനുമതിയില്ലാതെയും പ്രവർത്തിച്ച പുറമേരി ടൗണിലെ ഡെന്റൽ പേൾ മൾട്ടി സ്പെഷ്യാലിറ്റി ക്ലിനിക്കിന്റെ പ്രവർത്തനമാണ് ആരോഗ്യവിഭാഗം നിർത്തിവെപ്പിച്ചത്.

ബയോമെഡിക്കൽ മാലിന്യം അലക്ഷ്യമായി കൈകാര്യം ചെയ്തതുമായി ബന്ധപ്പെട്ട് ആരോഗ്യ വിഭാഗത്തിന് ലഭിച്ച പരാതിയെത്തുടർന്ന് ആരോഗ്യ വിഭാഗം പരിശോധന നടത്തുകയായിരുന്നു. പുറമേരി കുടുംബാരോഗ്യകേന്ദ്രം ഹെൽത്ത് ഇൻസ്പെക്ടർ സുരേന്ദ്രൻ കല്ലേരി, ജെഎച്ച്ഐകെ സന്ദീപ് കുമാർ എന്നിവർ നടത്തിയ പരിശോധനയെത്തുടർന്നാണ് നടപടി. സ്ഥാപനത്തിൻ്റെ പ്രവർത്തനം തുടർന്നാൽ മാരകമായ ആരോഗ്യപ്രശ്നങ്ങൾ ഉണ്ടാവാൻ സാധ്യതയുണ്ടെന്ന് ബോധ്യപ്പെട്ടതിൻ്റെ അടിസ്ഥാനത്തിലാണ് സ്ഥാപനത്തിൻ്റെ പ്രവർത്തനം നിർത്തിവെക്കാൻ ഉത്തരവ് നൽകിയതെന്ന് കുടുംബാരോഗ്യകേന്ദ്രം മെഡിക്കൽ ഓഫീസർ ഡോക്ടർ ഇസ്മയിൽ പുളിയം വീട്ടിൽ അറിയിച്ചു.