ഉമാ തോമസ് എംഎൽഎയ്ക്ക് പരിക്കേറ്റ സംഭവത്തിൽ ഹെൽത്ത് ഇൻസ്പെക്ടർക്ക് സസ്പെൻഷൻ
- നൃത്ത പരിപാടിക്ക് ലൈസൻസ് അപേക്ഷ നൽകിയത് മേലധികാരികളെ അറിയിച്ചില്ല, പരിപാടി നടന്ന ദിവസം സ്റ്റേഡിയം സന്ദർശിച്ചില്ല എന്നീ കാരണങ്ങൾകൊണ്ടാണ് സസ്പെൻഷൻ
കൊച്ചി: കലൂരിൽ ഉമാ തോമസ് എംഎൽഎയ്ക്ക് പരിക്കേറ്റ സംഭവത്തെ തുടർന്ന് ഹെൽത്ത് ഇൻസ്പെക്ടർക്ക് സസ്പെൻഷൻ. നൃത്ത പരിപാടിക്ക് ലൈസൻസ് അപേക്ഷ നൽകിയത് മേലധികാരികളെ അറിയിച്ചില്ല, പരിപാടി നടന്ന ദിവസം സ്റ്റേഡിയം സന്ദർശിച്ചില്ല എന്നീ കാരണങ്ങൾകൊണ്ടാണ് സസ്പെൻഷൻ.
കൂടാതെ റവന്യൂ, ഹെൽത്ത്, എഞ്ചിനീയറിംഗ് വിഭാഗങ്ങളുടെ വീഴ്ച പരിശോധിച്ച് റിപ്പോർട്ട് സമർപ്പിക്കാനും നഗരസഭാ സെക്രട്ടറിക്ക് നിർദേശം നൽകിയിട്ടുണ്ട്. പരിപാടിക്ക് ഒരു ദിവസം മുൻപാണ് സംഘാടകർ വകുപ്പുകൾക്ക് അപേക്ഷ നൽകിയത്. ടിക്കറ്റില്ലാതെ നടത്തുന്ന പരിപാടിയെന്ന് നഗരസഭയെ തെറ്റിദ്ധരിപ്പിച്ചുകൊണ്ടാണ് അപേക്ഷ സമർപ്പിച്ചത്. പരിപാടിയുടെ തലേദിവസം നഗരസഭാ അധികൃതർ പരിശോധനയ്ക്കായി സ്റ്റേഡിയത്തിൽ ചെന്നപ്പോൾ അവിടെ സ്റ്റേജ് നിർമ്മാണം ഒന്നും നടക്കാതിരുന്നത് കൊണ്ട് തിരിച്ചുപോവുകയായിരുന്നു.സ്റ്റേജ് കെട്ടിയത് നൃത്ത പരിപാടിയുടെ ദിവസമാണ്.
