മികച്ച ജീവിതനിലവാരമുള്ള രാജ്യങ്ങളുടെ പട്ടികയിൽ ബഹ്റൈൻ 36-ാം സ്ഥാനത്ത്

• അമേരിക്കൻ മാഗസിനായ സിഇഒ വേൾഡ് മികച്ച ജീവിതനിലവാരമുള്ള രാജ്യങ്ങളുടെ പട്ടിക പുറത്ത് വിട്ടു

മനാമ: മികച്ച ജീവിതനിലവാരമുള്ള രാജ്യങ്ങളുടെ പട്ടികയിൽ ബഹ്റൈൻ 36-ാം സ്ഥാനത്ത്.അമേരിക്കൻ മാഗസിനായ സിഇഒ വേൾഡ് മികച്ച ജീവിതനിലവാരമുള്ള രാജ്യങ്ങളുടെ പട്ടിക പുറത്ത് വിട്ടു. ക്വാളിറ്റി ഓഫ് ലൈഫ് ഇൻഡക്സിൻറെ പട്ടികയിൽ ബഹ്റൈന് ആണ് ആഗോളതലത്തിൽ 36-ാം സ്ഥാനത്ത് ഉള്ളത്. അറബ് രാജ്യങ്ങളിൽ ബഹ്റൈൻ രണ്ടാം സ്ഥാനത്താണ് ഉള്ളത്. പട്ടിക തയാറാക്കിയത് ലോകമെമ്പാടുമുള്ള 196 രാജ്യങ്ങളെ വിലയിരുത്തി, കാൽ ദശലക്ഷത്തിലധികം വ്യക്തികളുടെ അഭിപ്രായങ്ങളെ അടിസ്ഥാനമാക്കിയാണ്.

മികച്ച തൊഴിൽ അന്തരീക്ഷം, വരുമാന സമത്വം, സാംസ്കാരിക സ്വാധീനം, മെച്ചപ്പെട്ട പൊതുജനാരോഗ്യം, വിദ്യാഭ്യാസ ഗുണനിലവാരം, സ്ഥിരതയും സുരക്ഷയും എന്നിവയുൾപ്പെടെ നിരവധി ഘടകങ്ങളെ വിലയിരുത്തിയാണ് സൂചിക തയാറാക്കിയത്. പട്ടികയിൽ ഒന്നാമത് സ്വിറ്റ്സർലൻഡാണ്. നോർവേയും ഐസ്‌ലൻഡും യഥാക്രമം രണ്ടും മൂന്നും സ്ഥാനത്തെത്തി.