അനുരാഗികളുടെ ദിനം , ഇന്നും ഇന്നലെയും
- പ്രണയദിനം അഥവാ വാലൻ്റൈൻസ് ദിനം ,സെൻ്റ് വാലൻ്റൈൻസ്ഡേ അല്ലെങ്കിൽ സെൻ്റ് വാലൻ്റൈൻ്റെ പെരുന്നാൾ എന്നുമാണ് ഈ ദിനം അറിയപ്പെടുന്നത്.
പരസ്പരം സ്നേഹിക്കുക എന്നാലത് സ്നേഹബന്ധനമാകാതിരിക്കട്ടെ മറിച്ച് രണ്ട് ആത്മീയ തീരങ്ങൾക്കിടയിൽ ചലിക്കുന്ന ആഴിയാകട്ടെ- പ്രണയത്തെക്കുറിച്ച് പ്രണയത്തിന്റെ വിഖ്യാത എഴുത്തുകാരൻ ഖലീൽ ജിബ്രാന്റെ വരികളാണിത്. എല്ലാവർഷവും ഫെബ്രുവരി 14-പ്രണയദിനമാണ്. പ്രണയിക്കുന്നവരുടെ ദിനം. ഇരുഹൃദയങ്ങൾ ഇഴ പിരിയാതെ കോർത്തെടുക്കാനുള്ള ആദ്യ പടിയാണ് ഈ ദിനമെന്ന് യുവത്വം ഇന്ന് കരുതുന്നു. മധുരവും പൂക്കളും സ്നേഹത്തിന്റെ പങ്കുവെക്കലും കലർന്ന ഇന്നത്തെ പ്രണയദിനത്തിന് പിന്നിൽ അവിസ്മരണീയമായ ഇന്നലെകളുണ്ടത്രേ.
പ്രണയദിനം അഥവാ വാലൻ്റൈൻസ് ദിനം ,സെൻ്റ് വാലൻ്റൈൻസ്ഡേ അല്ലെങ്കിൽ സെൻ്റ് വാലൻ്റൈൻ്റെ പെരുന്നാൾ എന്നുമാണ് ഈ ദിനം അറിയപ്പെടുന്നത്. വാലൻ്റൈൻ എന്ന രക്തസാക്ഷിയെ ആദരിക്കുന്ന ഒരു ക്രിസ്ത്യൻ പെരുന്നാൾ എന്ന നിലയിലാണ് പ്രണയദിനം ഉത്ഭവിച്ചത്. പിന്നീടുള്ള നാടോടി പാരമ്പര്യങ്ങളിലൂടെ ഇത് പല കൈവഴിയായി മാറി. ലോകത്തിൻ്റെ പല പ്രദേശങ്ങളിലും പ്രണയത്തിൻ്റെയും സാംസ്കാരത്തിന്റെയും മതപരവും വാണിജ്യപരവുമായ ഒരു പ്രധാന ആഘോഷമായി പ്രണയദിനം രൂപപ്പെട്ടു.ചരിത്രത്തിലേക്ക് നോക്കുമ്പോൾ അമേരിക്കയിലും ലോകമെമ്പാടുമുള്ള മറ്റ് രാജ്യങ്ങളിലും പ്രിയപ്പെട്ടവർക്കിടയിൽ സെൻ്റ് വാലൻ്റൈൻ്റെ പേരിൽ സ്നേഹം പങ്കുവെക്കപ്പെടുന്നു. എന്നാൽ ആരാണ് ഈ സെൻ്റ് വാലൻ്റൈൻ, ഈ പാരമ്പര്യങ്ങൾ എവിടെ നിന്നാണ് വന്നത്? വാലൻ്റൈൻസ്ഡേയുടെ അർത്ഥത്തെയും ചരിത്രത്തെയും കുറിച്ച് കണ്ടെത്താൻ ശ്രമിക്കുമ്പോൾ പുരാതന റോമൻ ആചാരമായ ലുപ്പർകാലിയയിൽ നിന്ന് വിക്ടോറിയൻ ഇംഗ്ലണ്ടിലെ കാർഡ് നൽകുന്ന ആചാരങ്ങൾവരെ സഞ്ചരിക്കേണ്ടിവരും.
യഥാർത്ഥത്തിൽ രണ്ട് വ്യത്യസ്ത ചരിത്ര കഥാപാത്രങ്ങളാണ് വാലൻ്റൈൻ. പ്രണയ ദിനത്തിൽ ക്രിസ്ത്യൻ, പുരാതന റോമൻ പാരമ്പര്യത്തിൻ്റെ അവശിഷ്ടങ്ങൾ ഇതിൽ അടങ്ങിയിരിക്കുന്നുവെന്നും പറയപ്പെടുന്നു. എന്നാൽ ആരാണ് വിശുദ്ധ വാലൻ്റൈൻ.? ഈ ആചാരവുമായി അദ്ദേഹത്തിന്റെ ബന്ധത്തെ അന്വേഷിക്കുമ്പോൾ വാലൻ്റൈൻ അല്ലെങ്കിൽ വാലൻ്റൈനസ് എന്ന് പേരുള്ള രക്തസാക്ഷികളെ കാണാം . മൂന്നാം നൂറ്റാണ്ടിൽ റോമിൽ സേവനമനുഷ്ഠിച്ച ഒരു പുരോഹിതനായിരുന്നു വാലൻ്റൈൻ എന്നാെരു ഐതിഹ്യമുണ്ട്. ചക്രവർത്തി ക്ലോഡിയസ് രണ്ടാമൻ, അവിവാഹിതരായ പുരുഷൻമാർ ഭാര്യമാരും കുടുംബവുമു ള്ളവരേക്കാൾ മികച്ച സൈനികരാണെന്ന് കരുതി, അദ്ദേഹം യുവാക്കളുടെ വിവാഹം നിയമവിരുദ്ധമാക്കി. രാജകൽപ്പനയുടെ അനീതി മനസ്സിലാക്കിയ വാലൻ്റൈൻ, ക്ലോഡിയസിനെ ധിക്കരിക്കുകയും യുവപ്രേമികൾക്കായി രഹസ്യമായി വിവാഹങ്ങൾ നടത്തുകയും ചെയ്തു. വാലൻ്റൈൻ്റെ പ്രവർത്തനങ്ങൾ കണ്ടെത്തിയപ്പോൾ, അദ്ദേഹത്തെ റോമിന് പുറത്ത് വെച്ച് ക്ലോഡിയസ് രണ്ടാമൻ ശിരഛേദം ചെയ്തു.വാലൻ്റൈൻ ഇതിഹാസങ്ങൾക്ക് പിന്നിലെ യാഥാർത്ഥ്യം അവ്യക്തമാണെങ്കിലും കഥകളെല്ലാം വീരവും സങ്കടങ്ങളും കലർന്നതാണ്. ഏറ്റവും പ്രധാനമായി പ്രണയ പ്രതീകമായി അദ്ദേഹത്തെ കാണാം. വാലൻ്റൈൻസ് ദിനം ഫെബ്രുവരി പകുതിയോടെ ആഘോഷിക്കുന്നത് വാലൻ്റൈൻ്റെ മരണത്തിൻ്റെയോ ശവസംസ്കാരത്തിൻ്റെയോ വാർഷികത്തിൻ്റെയോ സ്മരണയ്ക്കായാണ് ആഘോഷിക്കുന്നതെന്ന് ചിലർ വിശ്വസിക്കുമ്പോൾ, ഇത് ഏകദേശം AD 270-ഓടെ സംഭവിച്ചിരിക്കാമെന്ന് മറ്റുള്ളവർ അവകാശപ്പെടുന്നു. അന്ന് വസന്തകാലത്തിൻ്റെ തുടക്കത്തിലാണ് ഇത് ആഘോഷിക്കപ്പെട്ടത്. അതിൽ നറുക്കെടുപ്പിലൂടെ സ്ത്രീകളെ പുരുഷന്മാരുമായി ജോഡിയാക്കിയിരുന്നു. വാലൻ്റൈൻസ് ദിനം കൊണ്ടുവന്നത് പോപ്പ് ജെലാസിയസ് ഒന്നാമനാണെന്ന് പറയുന്നവരുമുണ്ട്. ഏകദേശം പതിനാലാം നൂറ്റാണ്ട് മുതൽ പ്രണയദിനമായി ആഘോഷിക്കപ്പെട്ടുവരുന്നുണ്ടത്രേ.
