അറ്റകുറ്റപ്പണി നടക്കുന്നതിനാൽ ട്രെയിൻ ഗതാഗത്തിൽ താത്കാലിക മാറ്റം
- സേലം റെയിൽവേ ഡിവിഷന് കീഴിലെ സ്ഥലങ്ങളിലാണ് അറ്റകുറ്റപ്പണികൾ നടക്കുന്നത്
ചെന്നൈ: സേലം റെയിൽവേ ഡിവിഷന് കീഴിലെ സ്ഥലങ്ങളിൽ അറ്റകുറ്റപ്പണികൾ നടക്കുന്നതിനാൽ ട്രെയിൻ ഗതാഗത്തിൽ താഴെ പറയുന്ന വിധം താത്കാലിക മാറ്റം വരുത്തിയതായി റെയിൽവേ അധികൃതർ അറിയിച്ചു.
ഒക്ടോബർ മൂന്ന്, അഞ്ച്, ഏഴ് തീയതികളിൽ എറണാകുളത്തു നിന്നും പുറപ്പെടേണ്ട എറണാകുളം ജംഗ്ഷൻ ടാറ്റാ നഗർ എക്സ്പ്രസ് ട്രെയിൻ (18190) പോത്തനൂർ ജങ്ഷൻ, കോയമ്പത്തൂർ ജംഗ്ഷൻ വഴി തിരിച്ചു വിടും. യാത്രക്കാരുടെ സൗകര്യത്തിനായി ഈ ട്രെയിന് കോയമ്പത്തൂർ ജംഗ്ഷനിൽ അധിക സ്റ്റോപ്പും അനുവദിച്ചിട്ടുണ്ട്.
ഒക്ടോബർ ഒന്നിന് ഉച്ചയ്ക്ക് ഒരു മണിക്ക് തിരുച്ചിറപ്പള്ളിയിൽ നിന്നും പുറപ്പെടേണ്ട തിരുച്ചിറപ്പള്ളി- പാലക്കാട് ടൗൺ എക്സ്പ്രസ് ട്രെയിൻ (16843) ഉച്ചയ്ക്ക് 2.45 ന് കരുരിൽ നിന്നാണ് പുറപ്പെടുക. തിരുച്ചിറപ്പള്ളിയിൽ നിന്നും കരൂർ വരെയുള്ള ഈ ട്രെയിനിൻ്റെ സർവ്വീസ് റദ്ദാക്കിയിട്ടുണ്ട്.
സേലം ഡിവിഷന് കീഴിലെ മേഖലകളിൽ ഒകേ്‌ടാബർ മൂന്ന്, അഞ്ച്, ഏഴ് തീയതികളിൽ എറണാകുളം ജങ്ഷൻ ടാറ്റാ നഗർ എക്സ്പ്രസ് ട്രെയിനിന് (18190) 50 മിനുട്ടും ആലപ്പുഴ ധൻബാദ് എക്സ്പ്രസ് ട്രെയിനിന് (13352) 45 മിനുട്ടും നിയന്ത്രണം ഉണ്ടാവുമെന്നും റെയിൽവേ അധികൃതർ അറിയിച്ചു.
