‘എഡിറ്റ്സ്’ വരുന്നു;പുത്തൻ ആപ്പ് പ്രഖ്യാപിച്ച് ഇൻസ്റ്റഗ്രാം

• വീഡിയോ പ്രൊഡക്ഷന് വേണ്ടിയുള്ള എല്ലാ ടൂളുകളും ആപ്ലിക്കേഷനിലുണ്ടാകും

കാലിഫോർണിയ: പുതിയ വീഡിയോ എഡിറ്റിംഗ് ആപ്ലിക്കേഷൻ പ്രഖ്യാപിച്ച് ഇൻസ്റ്റഗ്രാം. എഡിറ്റ്സ് എന്നാണ് ഇൻസ്റ്റയുടെ പുതിയ ആപ്പിൻ്റെ പേര്. ക്രിയേറ്റീവ് ടൂളുകൾ ലഭ്യമാവുന്ന സമ്പൂർണ സ്യൂട്ട് എന്നാണ് എഡിറ്റ്സ് ആപ്പിന് ഇൻസ്റ്റഗ്രാം തലവൻ ആദം മോസ്സെരി നൽകുന്ന വിവരം. അമേരിക്കയിൽ ചൈനീസ് സോഷ്യൽ മീഡിയ പ്ലാറ്റ്ഫോമായ ടിക്ടോക്കിന് നിരോധനം വരാനിടയുണ്ടായിരുന്ന സാഹചര്യം മുന്നിൽക്കണ്ടായിരുന്നു പുതിയ എഡിറ്റ്സ് ആപ്പ് ഇൻസ്റ്റഗ്രാം പ്രഖ്യാപിച്ചത്. അടുത്ത മാസം വരെ എഡിറ്റ്സ് ആപ്പ് ഡൗൺലോഡ് ചെയ്യാൻ ലഭ്യമാവില്ല. ആപ്പിളിന്റെ ആപ്പ് സ്റ്റോറിൽ എഡിറ്റ്സ് ഇപ്പോൾ പ്രീ-ഓർഡർ ചെയ്യാം. എഡിറ്റ്സിന്റെ ആൻഡ്രോയ്ഡ് വേർഷൻ നടക്കുകയാണ്. എഡിറ്റ്സിന്റെ ഇരു വേർഷനുകളും ഒരേസമയമാകുമോ ഇൻസ്റ്റ ഔദ്യോഗികമായി റിലീസ് ചെയ്യുക എന്ന് വ്യക്തമല്ല.

വീഡിയോ ക്രിയേറ്റർമാർക്ക് ഏറ്റവും മികച്ച ടൂളുകൾ നൽകാനാണ് ശ്രമമെന്നും’ ഇൻസ്റ്റഗ്രാം തലവൻ ആദം മോസ്സെരി എഡിറ്റ്സ് ആപ്പ് പ്രഖ്യാപിച്ചുകൊണ്ട് പറഞ്ഞു.വീഡിയോ ക്രിയേറ്റർമാർക്ക് ഫോണിൽ ഏറ്റവും മികച്ച എഡിറ്റിംഗ് അനുഭവം നൽകാൻ ലക്ഷ്യമിട്ടുള്ളതാണ് എഡിറ്റ്സ് എന്ന ആപ്പ്. വീഡിയോ പ്രൊഡക്ഷന് വേണ്ടിയുള്ള എല്ലാ ടൂളുകളും ഈ ആപ്ലിക്കേഷനിലുണ്ടാകും. ആപ്പ് സ്റ്റോറിലെ വിവരങ്ങൾ പ്രകാരം എഡിറ്റ്സ് ഒരു സൗജന്യ ആപ്പായിരിക്കും.
റീലുകളുടെ ദൈർഘ്യം 3 മിനിറ്റായി ഉയർത്തിയതാണ് ഇൻസ്റ്റഗ്രാം അറിയിച്ച മറ്റൊരു അപ്ഡേറ്റ്. മുമ്പ് 90 സെക്കൻഡ് വരെ ദൈർഘ്യമുള്ള വീഡിയോ റീൽസുകളായിരുന്നു ഇൻസ്റ്റഗ്രാമിൽ അപ്ലോഡ് ചെയ്യാൻ സാധിച്ചിരുന്നത്. ഇതിൽ മാറ്റം വരികയാണ്. ഇനി മുതൽ മൂന്ന് മിനിറ്റ് വരെ ദൈർഘ്യമുള്ള റീലുകൾ ഇൻസ്റ്റ അനുവദിക്കും. യൂട്യൂബ് ഷോർട്സിന്റെ സമാനമായ വീഡിയോ ദൈർഘ്യമാണിത്.