ഡോക്ടർ എ പി ജെ അബ്ദുൽ കലാം രാഷ്ട്ര സേവാ പുരസ്കാരം രോഷ്നി വിനോദിന്

• കോഴിക്കോട് എം.എൽ.എ അഹമ്മദ് ദേവർ കോവിൽ പുരസ്കാര വിതരണം നടത്തി

കോഴിക്കോട്: ഡോക്ടർ എ.പി.ജെ അബ്ദുൽ കലാമിന്‍റെ പത്താം ചരമ വാർഷികത്തോടനുബന്ധിച്ച് ബ്രീസ് ഫൗണ്ടേഷൻ വിവിധ മേഖലകളിൽ പ്രവർത്തിച്ച് വരുന്ന 14 പേർക്ക് രാഷ്ട്ര സേവാ പുരസ്കാരം നൽകി. പുരസ്കാരം ഗവൺമെൻറ് ഹയർ സെക്കൻഡറി സ്കൂൾ ഇംഗ്ലീഷ് അധ്യാപിക രോഷ്നി വിനോദിനു ലഭിച്ചു.

വെയ്സ്റ്റ് ടു റിസോഴ്സസ് എന്ന ആശയത്തിൽ നിന്നും ചിലവ് കുറഞ്ഞ രീതിയിൽ കൃഷി ചെയ്യുന്നതിനും, പാഴ് വസ്തുക്കളെ മൂല്യവർദ്ധിത ഉൽപ്പന്നങ്ങൾ ആക്കി മാറ്റി വീട്,സ്കൂൾ,നഗര സൗന്ദര്യവൽക്കരണത്തിനു വേണ്ടി ഉപയോഗപ്പെടുത്തുന്നതിനും, മുനിസിപ്പാലിറ്റികളിൽ ഹെൽത്ത് ഡിപ്പാർട്ട്മെൻ്റ് അംഗങ്ങൾക്കും, ഹരിത കർമ്മസേനക്കും, എൻ എസ് എസ്, ഗൈഡ്സ് എന്നിവർക്കും ഉപയോഗശൂന്യമായ ടയർ, പ്ലാസ്റ്റിക് കേൻ എന്നിവ കൃഷി സങ്കേതങ്ങൾ ആക്കി മാറ്റാനുള്ള ക്ലാസുകൾ നടത്തുന്നതുമായ പ്രവർത്തനങ്ങളേയും, പരിസ്ഥിതി സംരക്ഷണ പ്രവർത്തനങ്ങളേയും വിലയിരുത്തിയാണ് രോഷ്നി വിനോദിന് പുരസ്കാരം നൽകിയത്. മട്ടുപ്പാവ് കൃഷിക്ക് കേരള കൃഷി വകുപ്പിന്റെ വനിത കർഷക അവാർഡും ജൈവ പച്ചക്കറി കൃഷിക്ക് മലയാള പുരസ്കാരം അവർഡും ടീച്ചർ നേടിയിട്ടുണ്ട്.

ബ്രീസ് ഫൗണ്ടേഷൻ സ്ഥാപകനായ ഡോക്ടർ ലൂയിസ് അധ്യക്ഷനായ ചടങ്ങിൽ കോഴിക്കോട് എം.എൽ.എ അഹമ്മദ് ദേവർ കോവിൽ പുരസ്കാര വിതരണം നടത്തി . എ പി ജെ അബ്ദുൽ കലാമിന്റെ ചിത്രം വരച്ച കർണികാ കലാക്ഷേത്രത്തിലെ കുട്ടികൾക്ക് സർട്ടിഫിക്കറ്റ് വിതരണവും നടന്നു. പ്രകൃതിയെ ആസ്പദമാക്കി നൂറ്റൊന്ന് പേരെഴുതിയ കവിതകൾ അടങ്ങിയ പുസ്തകം “പ്രകൃതിയും പ്രണയവും” പി കെ ഗോപി, കെ.പി കെ വേങ്ങരയ്ക്ക് നൽകി പ്രകാശനം ചെയ്തു. ശ്രീകുമാർ നടുമുറ്റം സ്വാഗതം പറഞ്ഞ ചടങ്ങിൽ മനോജ് ഗുരുവായൂർ നന്ദിയും പറഞ്ഞു.