പത്താംക്ലാസ് ബോർഡ് പരീക്ഷ; ചോദ്യക്കടലാസിൽ മാറ്റം വരുത്തി സിബിഎസ്ഇ
- വിദ്യാർഥികൾക്ക് പുതുക്കിയ ചോദ്യക്കടലാസ് പരിചയപ്പെടുന്നതിനായി ഇതിന്റെ മാതൃക cbseacademic.nic.in-ൽ പ്രസിദ്ധീകരിച്ചിട്ടുണ്ട്
ന്യൂഡൽഹി: പത്താംക്ലാസ് ബോർഡ് പരീക്ഷയുടെ ചോദ്യക്കടലാസിൽ പ്രധാന മാറ്റങ്ങൾ വരുത്തി സിബിഎസ്ഇ. 2026-ലെ പരീക്ഷയിലാണ് മാറ്റങ്ങൾ വരുത്തിയത്. സയൻസ്, സോഷ്യൽ സയൻസ് ചോദ്യക്കടലാസുകൾ വിവിധ ഭാഗങ്ങളായി തിരിച്ചതാണ് പ്രധാനമാറ്റമെന്ന് സിബിഎസ്ഇ കൺട്രോളർ ഓഫ് എക്സാമിനേഷൻസ് ഡോ. സന്യാം ഭരദ്വാജ് അറിയിച്ചു. വിദ്യാർഥികൾക്ക് പുതുക്കിയ ചോദ്യക്കടലാസ് പരിചയപ്പെടുന്നതിനായി ഇതിന്റെ മാതൃക cbseacademic.nic.in-ൽ പ്രസിദ്ധീകരിച്ചിട്ടുണ്ട്.
സയൻസിനു മൂന്ന് ഭാഗങ്ങൾ. സെക്ഷൻ എ -ബയോളജി, ബി-കെമിസ്ട്രി, സി-ഫിസിക്സ്. സോഷ്യൽ സയൻസിനു നാല് ഭാഗങ്ങൾ. സെക്ഷൻ എ -ഹിസ്റ്ററി, ബി -ജ്യോഗ്രഫി, സി -പൊളിറ്റിക്കൽ സയൻസ്, ഡി -ഇക്കണോമിക്സ്. പരീക്ഷയെഴുതുമ്പോൾ, ഉത്തരക്കടലാസ് സയൻസിന് മൂന്ന് ഭാഗമായും സോഷ്യൽ സയൻസിന് നാല് ഭാഗമായും തിരിക്കണം. ബന്ധപ്പെട്ട ഭാഗത്തിനായി നിശ്ചയിച്ചിരിക്കുന്ന സ്ഥലത്തുമാത്രമേ ആ ഭാഗത്തെ ഉത്തരങ്ങൾ എഴുതാവൂ. ഒരു ഭാഗത്തെ ഉത്തരം മറ്റൊരു ഭാഗത്ത് എഴുതുകയോ കൂട്ടിച്ചേർക്കുകയോ ചെയ്യരുത്. ഇങ്ങനെവന്നാൽ മൂല്യനിർണയം നടത്തില്ല. മാത്രമല്ല, ഫലം പ്രഖ്യാപിച്ചതിനുശേഷമുള്ള പരിശോധനയിലോ പുനർമൂല്യനിർണയത്തിലോ ഇവ പരിഗണിക്കില്ല.
