മേയർക്കും എംഎൽഎയ്ക്കും ക്ലീൻ ചീറ്റ് – തെളിവില്ലെന്ന് പോലീസ്
- കെഎസ്ആർടിസി ഡ്രൈവർ യദുവിന്റെ പരാതിയിലാണ് റിപ്പോർട്ട്
തിരുവനന്തപുരം: കെഎസ്ആർടിസി ഡ്രൈവർ യദുവുമായുണ്ടായ തർക്കത്തിൽ മേയർ ആര്യ രാജേന്ദ്രനും സച്ചിൻ ദേവ് എംഎൽഎയ്ക്കും ക്ലീൻ ചിറ്റ്. യദുവിന്റെ പരാതിയിൽ നടത്തിയ അന്വേഷണ റിപ്പോർട്ടിലാണ് മേയർക്കും എംഎൽഎയ്ക്കും എതിരേ തെളിവില്ലെന്ന് ചൂണ്ടിക്കാണിച്ചിരിക്കുന്നത്. സച്ചിൻ ദേവ് എംഎൽഎ ബസ്സിൽ അതിക്രമിച്ച് കയറിയതിനും അസഭ്യം പറഞ്ഞതിനും തെളിവില്ലെന്ന് റിപ്പോർട്ടിൽ പറയുന്നു.
പരാതിയിൽ പോലീസ് അന്വേഷണം കോടതി നിരീക്ഷണത്തിൽ നടത്തണമെന്നാവശ്യപ്പെട്ട് യദു ഹർജി നൽകിയിരുന്നു. എന്നാൽ ഇത് പരിഗണിക്കുന്നതിന് മുൻപേ തന്നെ അന്വേഷണ പുരോഗതി റിപ്പോർട്ട് കോടതി പോലീസിനോട് ആവശ്യപ്പെട്ടിരുന്നു. യദുവിൻ്റെ ഹർജി പരിഗണിക്കുമ്പോൾ അന്വേഷണ പുരോഗതി റിപ്പോർട്ട് പോലീസ് കോടതിയിൽ സമർപ്പിച്ചു. ഈ റിപ്പോർട്ടിലാണ് മേയർക്കും എംഎൽഎയ്ക്കുമെതിരേയുള്ള രണ്ട് കുറ്റങ്ങളും ഒഴിവാക്കിയിട്ടുള്ളത്. സച്ചിൻ ദേവ് എംഎൽഎ ബസ്സിൽ അതിക്രമിച്ച് കയറി അസഭ്യം പറഞ്ഞുവെന്നായിരുന്നു യദുവിൻ്റെ പരാതി. എംഎൽഎ ബസ്സിൽ അതിക്രമിച്ചുകയറിയതിന് തെളിവ് കണ്ടെത്താനായില്ലെന്നും അതിനാൽ ഈ പരാതി നിലനിൽക്കില്ലെന്നും പോലീസ് റിപ്പോർട്ടിൽ പറയുന്നു.
