വായു മലിനീകരണം അതിരൂക്ഷം; പ്രൈമറി സ്കൂ‌കൂളുകൾ അടച്ചു
- കഴിഞ്ഞ മൂന്നു ദിവസമായി വായു ഗുണനിലവാര സൂചിക കുത്തനെ ഉയരുകയാണ്
ന്യൂഡൽഹി: വായു മലിനീകരണം അതിരൂക്ഷമായി തുടരുന്ന ഡൽഹിയിൽ ഇന്നു മുതൽ കർശന നിയന്ത്രണങ്ങൾ. പ്രൈമറി സ്കൂ‌കൂളുകൾ അടച്ചു. ഇന്ന് മുതൽ ക്ലാസുകൾ ഓൺലൈനായി നടത്താനാണ് നിർദേശം. അടിയന്തരമല്ലാത്ത എല്ലാ ഖനന പ്രവർത്തനങ്ങളും നിർമാണ പ്രവർത്തികളും നിർത്തി വയ്ക്കാനും നിർദേശമുണ്ട്.
കഴിഞ്ഞ മൂന്നു ദിവസമായി വായു ഗുണനിലവാര സൂചിക കുത്തനെ ഉയരുകയാണ്. സെൻട്രൽ പൊല്യൂഷൻ കൺട്രോൾ ബോർഡ് റിപ്പോർട്ട് പ്രകാരം എയർ ക്വാളിറ്റി ഇൻഡക്സ് (എക്യുഐ) 409ൽ എത്തി. 39 മോണിറ്ററിങ് സ്റ്റേഷനുകളിൽ 21 എണ്ണം ഗുരുതരമായ എക്യുഐ ലെവലുകൾ രേഖപ്പെടുത്തിയിട്ടുണ്ട്. ജഹാംഗീർപുരി, ബവാന, വസീർപൂർ, രോഹിണി എന്നിവിടങ്ങളിൽ യഥാക്രമം 458, 455, 455, 452 എന്നിങ്ങനെയാണ് എക്യുഐ. കഴിഞ്ഞ രണ്ടു ദിവസങ്ങളിലും 400 നു മുകളിലാണ് ഡൽഹിയിലെ വായു ഗുണനിലവാര നിരക്ക്. കടുത്ത പുകമഞ്ഞ് ഡൽഹി വിമാനത്താവളത്തിന്റെ പ്രവർത്തനത്തെയടക്കം ഗുരുതരമായി ബാധിച്ചിട്ടുണ്ട്.
