തൂഫാൻ ലഹരി മാഫിയയുടെ അടിവേരറുക്കുക തന്നെ ചെയ്യും…..

• നെല്ലിയോട്ട് ബഷീർ

ലഹരി മാഫിയയുടെ വേരറുക്കാൻ കേരള പോലീസ്, എക്സൈസ്, വിദ്യാഭ്യാസം, ആരോഗ്യം എന്നീ വകുപ്പുകൾ സംയുക്തമായി നടപ്പിലാക്കിക്കൊണ്ടിരിക്കുന്ന ശക്തമായ ലഹരി വിരുദ്ധ ദൗത്യമാണ് ‘ഓപ്പറേഷൻ തൂഫാൻ – ദി നാർക്കോ ഹണ്ട്’. ഈ പദ്ധതി പ്രകാരം സംസ്ഥാനത്ത് ലഹരി വിതരണത്തിന്റെ ഉറവിടം കണ്ടെത്തി നശിപ്പിക്കുക,അന്തർസംസ്ഥാന പരിശോധന ശക്തമാക്കുക,ലഹരി കടത്ത് തടയുന്നതിനായി മറ്റ് ദക്ഷിണേന്ത്യൻ സംസ്ഥാനങ്ങളുമായി സഹകരിച്ച് സംയുക്ത നീക്കങ്ങൾ നടത്തുക,പൊതുജനങ്ങളുടെ പങ്കാളിത്തത്തോടെ ശക്തമായ ലഹരി വിരുദ്ധ പ്രതിരോധം തീർക്കുക,ലഹരി വിൽപ്പനയെക്കുറിച്ചുള്ള വിവരങ്ങൾ ജനങ്ങൾക്ക് അജ്ഞാതമായി അധികാരികളെ അറിയിക്കുന്നതിനായി ആപ്പുകളും വാട്‌സ്ആപ്പ് ചാറ്റ്‌ബോട്ടുകളും സജ്ജമാക്കുക എന്നിവയാണ്.കോഴിക്കോട്, കൊച്ചി ഉൾപ്പെടെയുള്ള കേരളത്തിന്റെ വിവിധ ഭാഗങ്ങളിൽ മിന്നൽ റെയ്ഡുകളും പരിശോധനകളും നടത്തി വൻ ലഹരി ശേഖരമാണ് ഈ ദൗത്യത്തിലൂടെ പോലീസ് പിടിച്ചെടുത്തു കൊണ്ടിരിക്കുന്നത്.സിനിമാതാരം മോഹൻലാൽ അടക്കമുള്ള പ്രമുഖർ ഈ ലഹരി വിരുദ്ധ പ്രചാരണത്തിന്റെ ഭാഗമായി രംഗത്തെത്തിയിട്ടുള്ളത് ഏറെ ആശാവഹമാണ്.തമിഴ്നാട്,കർണാടക,പുതുച്ചേരി മുഖ്യമന്ത്രിമാർ അന്തർസംസ്ഥാന ഓപ്പറേഷന് എല്ലാ പിന്തുണയും വാഗ്ദാനം ചെയ്തിരിക്കുന്നു, ഇതാണ് ചേർത്ത് പിടിക്കൽ.

ഒരു സമൂഹത്തിന്റെ ഭാവിയെ നിശ്ശബ്ദമായി തകർക്കുന്ന ഏറ്റവും വലിയ വെല്ലുവിളികളിലൊന്നായി ഇന്ന് മയക്കുമരുന്നിന്റെയും രാസലഹരിയുടെയും വ്യാപനം മാറിയിരിക്കുന്നു എന്ന് പറയേണ്ടതില്ല. ഒരുകാലത്ത് ഒറ്റപ്പെട്ട ചില സാഹചര്യങ്ങളിലെ പ്രശ്നമായി കണ്ടിരുന്ന ലഹരി ഇന്ന് അതിവേഗം മാറുന്ന സാങ്കേതികവിദ്യകളുടെയും സാമൂഹിക മാറ്റങ്ങളുടെയും ഇടയിലൂടെ പുതിയ രൂപങ്ങളിൽ നമ്മുടെ വീടുകളിലേക്കും വിദ്യാലയങ്ങളിലേക്കും യുവതലമുറയുടെ ജീവിതത്തിലേക്കും കടന്നുവരികയാണ്. അതുകൊണ്ടുതന്നെ ലഹരിവിരുദ്ധ പ്രവർത്തനം ഒരു ദിനാചരണത്തിൽ ഒതുങ്ങേണ്ടതല്ല; സമൂഹത്തിന്റെ സമഗ്രമായ മുന്നേറ്റമായി മാറേണ്ട സമയമാണിത്.

“മയക്കുമരുന്നുകളുടെയും രാസലഹരിയുടെയും വേരറുക്കാൻ ശക്തമായ പദ്ധതിയുമായി മുന്നോട്ടു വന്ന വി ഡി എസ് സർക്കാരിനെയും ആഭ്യന്തര മന്ത്രി രമേശ്‌ ചെന്നിത്തലയേയും നമുക്ക് അഭിനന്ദിക്കാം.ലഹരിയുടെ വിതരണ ശൃംഖലയെ തകർക്കുന്നതിനൊപ്പം, അതിന്റെ ഇരകളായി മാറിയവരെ ജീവിതത്തിലേക്ക് തിരികെ കൊണ്ടുവരാനും, യുവതലമുറയെ സംരക്ഷിക്കാനും, കുടുംബങ്ങളെയും സമൂഹത്തെയും ഈ പോരാട്ടത്തിൽ പങ്കാളികളാക്കാനുമുള്ള സമഗ്രമായ സമീപനമാണ് ഇന്ന് ആവശ്യം.ഇത് സർക്കാർ തിരിച്ചറിയുമെന്ന് നമുക്ക് പ്രത്യാശിക്കാം.

ലഹരി വ്യാപനത്തിന്റെ പിന്നിൽ പ്രവർത്തിക്കുന്ന ശക്തികളെ കണ്ടെത്തി നിയന്ത്രിക്കുന്നത് ഭരണകൂടത്തിന്റെ പ്രധാന ഉത്തരവാദിത്വമായി സർക്കാർ കാണുന്നു.കഴിഞ്ഞ കാലങ്ങളിലൊന്നും ഇത്തരം പ്രവർത്തനം നമുക്കു കാണാനായിട്ടില്ല.മയക്കുമരുന്ന് കടത്ത്, വിതരണ ശൃംഖല, സാമ്പത്തിക സഹായകേന്ദ്രങ്ങൾ, യുവാക്കളെ ലക്ഷ്യമിടുന്ന പുതിയ രീതികൾ എന്നിവക്കെതിരെ ശക്തമായ നിയമനടപടികളാണ് ഇപ്പോൾ കൈകൊണ്ടിരിക്കുന്നത്.എന്നാൽ നിയമനടപടികൾ മാത്രം കൊണ്ട് ഈ പ്രശ്നം പൂർണമായി പരിഹരിക്കാൻ കഴിയില്ല. പ്രതിരോധം, ബോധവൽക്കരണം, ചികിത്സ,പുനരധിവാസം എന്നിവയെല്ലാം ഒരുമിച്ചുള്ള ഒരു മാതൃകയാണ് വേണ്ടത്.

കേരളം പോലുള്ള സാമൂഹിക ബോധമുള്ള ഒരു സംസ്ഥാനത്ത് ലഹരിക്കെതിരായ പോരാട്ടത്തിന് കൂടുതൽ ശക്തമായ ജനകീയ പങ്കാളിത്തം ആവശ്യമാണ്.വീടുകളിൽ നിന്നാണ് ആദ്യ പ്രതിരോധം ആരംഭിക്കേണ്ടത്. കുട്ടികളുടെ സ്വഭാവത്തിലെ ചെറിയ മാറ്റങ്ങൾ പോലും ശ്രദ്ധിക്കുക,അവരുമായി സൗഹൃദപരമായ ആശയവിനിമയം നിലനിർത്തുക,അവരുടെ മാനസിക സമ്മർദ്ദങ്ങൾ മനസ്സിലാക്കുക എന്നിവ മാതാപിതാക്കളുടെ പ്രധാന ഉത്തരവാദിത്വമാണ്. നിയന്ത്രണത്തേക്കാൾ കൂടുതൽ കരുതലും വിശ്വാസവുമാണ് പുതിയ തലമുറയ്ക്ക് ആവശ്യം.

വിദ്യാലയങ്ങൾക്കും കോളേജുകൾക്കും ഇതിൽ വലിയ പങ്കുവഹിക്കാനുണ്ട്. ലഹരിയുടെ ദോഷങ്ങളെക്കുറിച്ചുള്ള ക്ലാസുകൾ മാത്രം മതിയാകില്ല; വിദ്യാർത്ഥികൾക്ക് ആത്മവിശ്വാസം വളർത്തുന്ന പ്രവർത്തനങ്ങളും മാനസിക പിന്തുണയും നൽകണം. കല, കായികം, വായന,സാമൂഹിക സേവനം തുടങ്ങിയ മേഖലകളിലേക്ക് യുവാക്കളെ കൂടുതൽ ആകർഷിക്കാൻ കഴിയണം. ലക്ഷ്യബോധമുള്ള ഒരു യുവതലമുറയെ സൃഷ്ടിക്കുകയാണ് ലഹരിക്കെതിരായ ഏറ്റവും വലിയ പ്രതിരോധം.

സമൂഹത്തിന് ചെയ്യാൻ കഴിയുന്ന കാര്യങ്ങൾ ഏറെയാണ്. ലഹരിയുടെ ഉപയോഗം ശ്രദ്ധയിൽപ്പെട്ടാൽ അത് മറച്ചുവയ്ക്കുന്നതിന് പകരം ശരിയായ ഇടപെടലുകൾ നടത്തണം.എന്നാൽ അതോടൊപ്പം ലഹരിയുടെ ഇരകളെ ഒറ്റപ്പെടുത്തുന്ന സമീപനം ഒഴിവാക്കണം. ഒരു വ്യക്തി തെറ്റായ വഴിയിലേക്ക് പോയാൽ അവനെ ജീവിതത്തിലേക്ക് തിരികെ കൊണ്ടുവരാനുള്ള ശ്രമമാണ് സമൂഹത്തിന്റെ മാനുഷിക ഉത്തരവാദിത്വം.

ഉദാഹരണത്തിന്, ഒരു യുവാവ് ലഹരിയുടെ പിടിയിൽപ്പെട്ടാൽ പലപ്പോഴും കുടുംബവും സമൂഹവും അവനെ കുറ്റക്കാരനായി മാത്രം കാണുന്നു. ഇതോടെ അവൻ കൂടുതൽ ഒറ്റപ്പെടുകയും പ്രശ്നം കൂടുതൽ ഗുരുതരമാവുകയും ചെയ്യുന്നു.എന്നാൽ കൗൺസലിങ്, ചികിത്സ, കുടുംബ പിന്തുണ, സാമൂഹിക അംഗീകാരം എന്നിവ ലഭിച്ചാൽ നിരവധി പേർക്ക് സാധാരണ ജീവിതത്തിലേക്ക് തിരിച്ചെത്താൻ കഴിയും. അതുകൊണ്ടാണ് ലഹരിവിരുദ്ധ പോരാട്ടം ശിക്ഷയുടെ മാത്രം ഭാഷയിൽ സംസാരിക്കരുതെന്ന് പറയുന്നത്.

ഭരണകൂടത്തിന്റെ ഭാഗത്ത് നിന്ന് കൂടുതൽ ഏകോപിതമായ പ്രവർത്തനങ്ങൾ ഉണ്ടാകുന്നുണ്ട്‌ . പോലീസും എക്സൈസും ആരോഗ്യവകുപ്പും വിദ്യാഭ്യാസവകുപ്പും സാമൂഹിക സംഘടനകളും ഒരുമിച്ച് പ്രവർത്തിക്കുന്ന ഒരു സ്ഥിരം സംവിധാനം ശക്തിപ്പെടുത്തണം. അതിർത്തി മേഖലകളിലും വിദ്യാഭ്യാസ സ്ഥാപനങ്ങളുടെ പരിസരങ്ങളിലും ലഹരി വിതരണത്തിനെതിരെ നിരീക്ഷണം ശക്തമാക്കണം. സാങ്കേതികവിദ്യ ഉപയോഗിച്ച് പുതിയ രീതിയിലുള്ള ലഹരി ഇടപാടുകൾ കണ്ടെത്താനും തടയാനും കഴിയണം.

ആഭ്യന്തര മന്ത്രിയുടെ ഇടപെടൽ ഈ വിഷയത്തിൽ ഏറെ ശ്ലാഘനീയമാണ്. സംസ്ഥാനത്തിന്റെ ആഭ്യന്തര സുരക്ഷയുമായി ബന്ധപ്പെട്ട ഒരു വിഷയമെന്ന നിലയിൽ ലഹരി വ്യാപനത്തിനെതിരെ ശക്തമായ നയപരമായ ഇടപെടലുകൾ ആവശ്യമാണ്. പോലീസിന്റെ പ്രവർത്തനങ്ങൾ കൂടുതൽ കാര്യക്ഷമമാക്കുക, ലഹരി കടത്ത് ശൃംഖലകളുടെ സാമ്പത്തിക അടിത്തറ തകർക്കുക, യുവാക്കളെ ലക്ഷ്യമിടുന്ന സംഘങ്ങളെ കണ്ടെത്തി നിയമത്തിന് മുന്നിൽ കൊണ്ടുവരിക തുടങ്ങിയ കാര്യങ്ങളിൽ ആഭ്യന്തര വകുപ്പിന് നിർണായക പങ്കുണ്ട്.

അതേസമയം, ആഭ്യന്തര ഇടപെടൽ നിയമനടപടികളിൽ മാത്രം ഒതുങ്ങാതെ സാമൂഹിക പ്രതിരോധത്തിലേക്കും വ്യാപിക്കണം. ഓരോ പോലീസ് സ്റ്റേഷനും ജനങ്ങളുമായി ചേർന്ന് പ്രവർത്തിക്കുന്ന ബോധവൽക്കരണ കേന്ദ്രങ്ങളായി മാറണം. വിദ്യാർത്ഥികളുമായും രക്ഷിതാക്കളുമായും സ്ഥിരമായ ആശയവിനിമയം നടത്തുകയും ലഹരി വിരുദ്ധ സന്ദേശങ്ങൾ സമൂഹത്തിന്റെ എല്ലാ തലങ്ങളിലേക്കും എത്തിക്കുകയും വേണം.

ലഹരിയുടെ വേരറുക്കാൻ ശക്തമായ നിയമവും അതിനൊപ്പം ശക്തമായ മനുഷ്യത്വവും ആവശ്യമാണ്. ലഹരി വിൽക്കുന്നവർക്കെതിരെ കർശന നടപടി സ്വീകരിക്കുമ്പോൾ, അതിന്റെ ഇരകളായവർക്കായി ചികിത്സയും പുനരധിവാസവും ഉറപ്പാക്കണം. ഒരു യുവാവിനെ രക്ഷപ്പെടുത്തുന്നത് ഒരു കുടുംബത്തെ രക്ഷിക്കുന്നതിന് തുല്യമാണ്; ഒരു തലമുറയെ സംരക്ഷിക്കുന്നതിന് തുല്യമാണ്.

ലോക ലഹരിവിരുദ്ധ ദിനം നമ്മോട് ആവശ്യപ്പെടുന്നത് ഒരു പ്രതിജ്ഞയാണ്, “ലഹരിക്കെതിരെ നാം ഇനി കാണികളാകില്ല.” ഓരോ കുടുംബവും, ഓരോ വിദ്യാലയവും, ഓരോ സ്ഥാപനവും, ഓരോ പൗരനും ഈ പോരാട്ടത്തിന്റെ ഭാഗമാകണം. “തൂഫാൻ” പോലുള്ള പദ്ധതികൾ ജനകീയ മുന്നേറ്റങ്ങളായി വളർന്നാൽ മാത്രമേ ലഹരിയുടെ വേരുകൾ പൂർണമായി ഇല്ലാതാക്കാൻ കഴിയൂ.

ലഹരിയില്ലാത്ത ഒരു സമൂഹം സ്വപ്നമല്ല; കൂട്ടായ പ്രവർത്തനത്തിലൂടെ സാക്ഷാത്കരിക്കാവുന്ന ഒരു ലക്ഷ്യമാണ്. കുറ്റപ്പെടുത്തലല്ല, കരുതലാണ് നമ്മുടെ ആയുധം. ഭയപ്പെടുത്തലല്ല, ബോധവൽക്കരണമാണ് നമ്മുടെ വഴി. മയക്കുമരുന്നുകളുടെയും രാസലഹരിയുടെയും ഇരുട്ടിനെതിരെ നമുക്ക് ഒരുമിച്ച് ഒരു പ്രകാശമായി മാറാം. ചേർത്തുനിർത്താം… ചേർന്ന് നിൽക്കാം… ഒരു ലഹരിമുക്ത തലമുറയ്ക്കായി.