കളക്ടറുടെ ഇന്റേൺഷിപ് പ്രോഗ്രാം (DCIP) – അപേക്ഷകൾ ക്ഷണിച്ചു
- ഇന്റേർൺഷിപ്പിന്റെ ഭാഗമാകാൻ താത്പര്യമുള്ളവർ www.dcipkkd.in എന്ന ലിങ്ക് സന്ദർശിച്ച് ഓൺലൈൻ അപേക്ഷ പൂരിപ്പിച്ച് നൽകണം.
കോഴിക്കോട് :ബിരുദധാരികളായ യുവതീ യുവാക്കൾക്ക് ജില്ലാ കളക്ട്ടേഴ്‌സ് ഇന്റേൺഷിപ് പ്രോഗ്രാമിലേക്ക് (DCIP)അപേക്ഷകൾ ക്ഷണിച്ചു.
ഭരണകൂടത്തോടൊപ്പം ജില്ലയിലെ വിവിധ വികസന, സാമൂഹ്യക്ഷേമ പദ്ധതികളിൽ പ്രവർത്തിക്കുവാനുള്ള അവസരമാണ് ജില്ലാകളക്ടറുടെ ഇന്റേർൺഷിപ്പ് പ്രോഗ്രാം. പൊതുഭരണ സംവിധാനങ്ങളെ അടുത്തറിയാൻ അവസരം നൽകികൊണ്ട് സർക്കാർ പദ്ധതികളിലും വികസന പരിപാടികളിലും പദ്ധതി ആസൂത്രണ ഘട്ടം മുതൽക്ക് തന്നെ സജീവ യുവജന പങ്കാളിത്തം ഉറപ്പുവരുത്തി കുടുതൽ കാലികവും ക്രിയാത്മകവുമായ മുന്നേറ്റം സാധ്യമാക്കുകയാണ് പരിപാടിയുടെ ലക്ഷ്യം.
പാർശ്വവൽക്കരിക്കപ്പെട്ട വിവിധ സാമൂഹ്യ വിഭാഗങ്ങളുടെ പ്രശ്‌നങ്ങളെ മനസ്സിലാക്കി കൊണ്ട് ക്രിയാത്മകമായ ഇടപെടലുകൾ നടത്താൻ അവസരം ലഭിക്കുന്നത് വഴി കൂടുതൽ വിശാലവും കരുണാർദ്രവുമായ ജീവിതവീക്ഷണമുള്ള സാമൂഹ്യപ്രതിബദ്ധരായ യുവജനസമൂഹത്തെ വാർത്തെടുക്കാൻ പരിപാടി മുഖാന്തരം സാധിക്കും. വിവിധ സർക്കാർ പദ്ധതികളെ വിശകലനം ചെയ്യാൻ അവസരമൊരുക്കുക വഴി വിമർശനാത്മകമായി വിഷയങ്ങളെ സമീപിക്കുവാനും, പ്രശ്ന പരിഹാരത്തിനുള്ള കഴിവ് ആർജ്ജിക്കുന്നതിനും യുവജനങ്ങളെ സഹായിക്കും വിധമാണ് പരിപാടി ക്രമീകരിച്ചിട്ടുള്ളത്.
യുവജനങ്ങളുടെ വ്യക്തിത്വ വികസനത്തിനും ഗുണപരമായ ജീവിത വീക്ഷണം വളർത്തിയെടുക്കുന്നതിനും കഴിയുന്നതെന്ന് ചുരുങ്ങിയ കാലം കൊണ്ടു തന്നെ തെളിയിക്കാൻ ഈ പരിപാടിക്ക് സാധിച്ചിട്ടുണ്ട്. ഇന്റേർൺഷിപ്പിന്റെ ഭാഗമാകാൻ താത്പര്യമുള്ളവർ www.dcipkkd.in എന്ന ലിങ്ക് സന്ദർശിച്ച് ഓൺലൈൻ അപേക്ഷ പൂരിപ്പിച്ച് നൽകുക. മാർച്ച് 24 (ഞായർ) രാത്രി 12 മണിക്കകം അപേക്ഷ സമർപ്പിക്കണം. നാല് മാസമാകും ഇന്റേർൺഷിപ്പിന്റെ കാലാവധി. സ്റ്റൈപെന്റ് ഉണ്ടായിരുക്കുന്നതല്ല. രണ്ട് ഘട്ടങ്ങളിലായാണ് തിരഞ്ഞെടുപ്പ്.
