കുവൈത്ത് -കോഴിക്കോട് എയർ ഇന്ത്യ എക്സ്പ്രസ് വിമാന സർവീസ് മുടങ്ങി
- സർവിസ് മുടങ്ങാൻ കാരണം വിമാനത്തിൽ പക്ഷിയിടിച്ചതിനെ തുടർന്നുണ്ടായ സാങ്കേതിക പ്രശ്‌നമാണ്
കുവൈത്ത് സിറ്റി:ഇന്നലെ ഉച്ചയ്ക്ക് 12.55ന് പുറപ്പെടേണ്ട കുവൈത്ത് – കോഴിക്കോട് എയർ ഇന്ത്യ എക്സ്സ്പ്രസ് വിമാന സർവീസ് മുടങ്ങി.സർവിസ് മുടങ്ങാൻ കാരണം വിമാനത്തിൽ പക്ഷിയിടിച്ചതിനെ തുടർന്നുണ്ടായ സാങ്കേതിക പ്രശ്‌നമാണ്.
സാങ്കേതിക തകരാർ പിന്നീട് പരിഹരിച്ചെങ്കിലും പൈലറ്റുമാരുടെ ഡ്യൂട്ടി സമയം സംബന്ധിച്ച ചട്ടം കാരണം സർവിസ് നടത്താൻ സാധിച്ചില്ല . യാത്രക്കാരിൽ നിന്ന് സന്നദ്ധരായവരെ ഒഴിവനുസരിച്ച് കൊച്ചിയിലേയ്ക്കും കണ്ണൂരിലേക്കുമുള്ള എയർ ഇന്ത്യ വിമാനങ്ങളിൽ നാട്ടിലേയ്ക്ക് അയച്ചു. ബാക്കിയുള്ളവരെ ഹോട്ടലിലേയ്ക്ക് മാറ്റി. ഇവരെ ഇന്ന് രാവിലെ കോഴിക്കോട്ടേയ്ക്ക് കൊണ്ടുപോകുമെന്ന് അധികൃതർ അറിയിച്ചു.
