വാൽപാറ വാഹനാപകടം : കാരണം ട്രാവലറിന്റെ ബ്രേക്കിനുണ്ടായ തകരാറെന്ന് പ്രാഥമിക നിഗമനം

• ചുരത്തിലെ പതിമൂന്നാം വളവിൽ വെച്ചായിരുന്നു വാഹനം താഴ്ചയിലേക്ക് വീണത്

വാൽപാറ: ഒൻപത് പേരുടെ ജീവനെടുത്ത വാൽപാറ ദുരന്തത്തിന്റെ കാരണം വിനോദസഞ്ചാര സംഘം സഞ്ചരിച്ച വാഹനത്തിന്റെ ബ്രേക്കിനുണ്ടായ തകരാറെന്ന് തമിഴ്‌നാട് പൊലീസിന്റെ പ്രാഥമിക നിഗമനം. ചുരത്തിലെ ഇരുപത്തിയേഴ് വളവുകൾ ഇറങ്ങിയ ശേഷം ബ്രേക്ക് സംവിധാനം ചൂടായി തകരാറിലാകാമെന്നും കരുതുന്നു. ചുരത്തിലെ പതിമൂന്നാം വളവിൽ വെച്ചായിരുന്നു വാഹനം താഴ്ചയിലേക്ക് വീണത്. പൂർണ്ണമായി കെട്ടിയൊരുക്കിയ സംരക്ഷണഭിത്തി ഇവിടെയുണ്ടായിരുന്നില്ല.

ചെറിയൊരു കൽഭിത്തി മാത്രമെ ഉണ്ടായിരുന്നുള്ളൂ ഫസ്റ്റ് ഗിയറിലും സെക്കന്റ് ഗിയറിലും മാറ്റിയിട്ട് വാഹനം ഇറങ്ങിയ സമയത്ത് നിയന്ത്രണം നഷ്ട‌പ്പെട്ട് നേരെ കോൺഗ്രീറ്റ് തൂണിൽ ഇടിക്കുകയും കൊക്കയിലേക്ക് പതിച്ചതുമാകാമെന്നാണ് നിഗമനം. കൽഭിത്തി തകർത്ത് 800 അടി താഴ്ചയിലേക്ക് വാൻ വീഴുകയായിരുന്നു. പാറയിടുക്കിൽ അഞ്ച് തവണ വാഹനം മറിഞ്ഞെന്നും ചിന്നഭിന്നമായ വാഹന അനശിഷ്ടങ്ങളാണ് റോഡിൽ പതിച്ചതെന്നുമാണ് വിവരം.