ഇക്കൊല്ലത്തെ ബജറ്റിലും ആദായ നികുതിയിൽ ചെറിയ ഇളവുകൾക്ക് സാധ്യത

• പുതിയ നികുതി സ്ക‌ീമിലേക്ക് കൂടുതൽ പേരെ ആകർഷിക്കാനുള്ള ഇളവുകൾ ധനമന്ത്രി പ്രഖ്യാപിച്ചേക്കും.

ന്യൂഡൽഹി : ധനമന്ത്രി നിർമല സീതാരാമന്റെ ഇക്കൊല്ലത്തെ ബജറ്റിലും ആദായ നികുതിയിൽ ചെറിയ ഇളവുകൾക്ക് സാധ്യത. പുതിയ നികുതി സ്ക‌ീമിലേക്ക് കൂടുതൽ പേരെ ആകർഷിക്കാനുള്ള ഇളവുകൾ ധനമന്ത്രി പ്രഖ്യാപിച്ചേക്കും. ദമ്പതികൾക്ക് സംയുക്ത ആദായ നികുതി റിട്ടേൺ ഫയൽ ചെയ്യുന്നതിനുള്ള സൗകര്യം അടക്കം ചില പരിഷ്കാരങ്ങൾക്കും ധനമന്ത്രി തയ്യാറായേക്കും.2019 ൽ അഞ്ചു ലക്ഷം വരെ വരുമാനമുള്ളവരെ ആദായ നികുതി പരിധിയിൽനിന്ന് ഒഴിവാക്കിയിരുന്നു. ഈ പരിധി പന്ത്രണ്ടായി കഴിഞ്ഞ തവണ ഉയർത്തിയത് മധ്യവർഗ്ഗത്തിൻറെ വൻ സ്വീകാര്യത നേടിയിരുന്നു. ബജറ്റിന് തൊട്ടു പിന്നാലെ നടന്ന ദില്ലി തെരഞ്ഞെടുപ്പിൽ 23 കൊല്ലത്തിനു ശേഷം ബിജെപി അധികാരത്തിൽ എത്തിഇത്തവണ ബജറ്റ് അവതരിപ്പിക്കുമ്പോഴും അഞ്ച് സംസ്ഥാനങ്ങളിലേക്ക് നടക്കുന്ന തെരഞ്ഞെടുപ്പ് ധനമന്ത്രിക്ക് മനസ്സിൽ വെയ്ക്കേണ്ടി വരും.

ഇളവിനുള്ള പന്ത്രണ്ട് ലക്ഷം എന്ന പരിധിയിൽ മാറ്റം വരാൻ സാധ്യതയില്ല. പുതിയ നികുതി സമ്പ്രദായത്തിലേക്ക് കൂടുതൽ പേരെ എത്തിക്കാൻ സ്റ്റാൻഡേഡ് ഡിഡക്ഷൻ ഇളവ് ഉയർത്താനുള്ള ആലോചനയുണ്ട്. നിലവിലെ എഴുപത്തയ്യായിരത്തിൽ നിന്ന് ഇത് ഒരു ലക്ഷമായി ഉയർത്തും എന്നാണ് പ്രതീക്ഷ.