നിപ:സമ്പർക്കപട്ടികയിലെ 75 പേരുടെ പരിശോധന ഫലം നെഗറ്റീവ്

• രോഗി ഐസിയുവിൽ തുടരുന്നു

മലപ്പുറം: വളാഞ്ചേരിയിൽ റിപ്പോർട്ട് ചെയ്ത നിപ രോഗബാധിതയുമായുമായി പ്രാഥമിക സമ്പർക്കത്തിൽ ഉണ്ടായിരുന്ന രണ്ടുപേരുടെ സാമ്പിൾ പരിശോധന ഫലം കൂടി നെഗറ്റീവ് ആയി. ഇതോടെ 75 പേരുടെ പരിശോധന ഫലമാണ് നെഗറ്റീവ് ആയത്. ഇനി അഞ്ചുപേരുടെ പരിശോധന ഫലം കൂടി വരാനുണ്ട്.

ഇതുവരെ 166 പേരാണ് സമ്പർക്ക പട്ടികയിൽ ഉള്ളത്. ഇവരെ നിരീക്ഷിച്ചുവരുന്നു. ഇവരിൽ 65 പേർ ഹൈ റിസ്‌ക് വിഭാഗത്തിലും 101 പേർ ലോ റിസ്‌ക് വിഭാഗത്തിലുമാണ്. അതിനിടെ മിംസ് ആശുപത്രിയിൽ ചികിത്സയിലായിരുന്ന 65 കാരിയെ പനി, തൊണ്ടവേദന എന്നീ ലക്ഷണങ്ങളോടെ മഞ്ചേരി മെഡിക്കൽ കോളേജ് ഐസിയുവിൽ പ്രവേശിപ്പിച്ചു. ഇവരുടേതടക്കമാണ് ഇന്ന് നെഗറ്റീവ് ആയ രണ്ടു പരിശോധന ഫലങ്ങൾ. കുറ്റിപ്പുറം സ്വദേശിയായ 27 കാരിയെയും ഇന്ന് മഞ്ചേരി മെഡിക്കൽ കോളേജ് ഐസൊലേഷൻ വാർഡിൽ പ്രവേശിപ്പിച്ചിട്ടുണ്ട്.