അധികാരം നഷ്ടമായതിന്റെ വിഭ്രാന്തിയിൽ മന്ത്രിമാരെ ആക്രമിച്ചുകൊണ്ട് നാട്ടിൽ കലാപമഴിച്ചുവിടാനാണ് സിപിഎം-ഡിവൈഎഫ്ഐ പ്രവർത്തകർ ശ്രമിക്കുന്നതെന്ന് ആഭ്യന്തരമന്ത്രി രമേശ് ചെന്നിത്തല
- നാടിന്റെ സമാധാനം ഇല്ലാതാക്കാനുള്ള എല്ലാ ശ്രമങ്ങളെയും സർക്കാർ കർശനമായി നേരിടുമെന്നും അദ്ദേഹം പറഞ്ഞു.
തിരുവനന്തപുരം: അധികാരം നഷ്ടമായതിന്റെ വിഭ്രാന്തിയിൽ മന്ത്രിമാരെ ആക്രമിച്ചുകൊണ്ട് നാട്ടിൽ കലാപമഴിച്ചുവിടാനാണ് സിപിഎം-ഡിവൈഎഫ്ഐ പ്രവർത്തകർ ശ്രമിക്കുന്നതെന്ന് ആഭ്യന്തരമന്ത്രി രമേശ് ചെന്നിത്തല. നാടിന്റെ സമാധാനം ഇല്ലാതാക്കാനുള്ള എല്ലാ ശ്രമങ്ങളെയും സർക്കാർ കർശനമായി നേരിടുമെന്നും അദ്ദേഹം പറഞ്ഞു. മുഖ്യമന്ത്രിയായിരുന്ന ഉമ്മൻചാണ്ടിയെ കണ്ണൂരിൽ വച്ച് കല്ലെറിഞ്ഞ് പരിക്കേൽപ്പിച്ചവരാണ് ഡിവൈഎഫ്ഐക്കാർ. മന്ത്രിയായിരിക്കെ എം.വി രാഘവനെയും കണ്ണൂരിൽ പലയിടങ്ങളിലാണ് സിപിഎം ആക്രമിച്ചത്. ഇന്ന് കായികമന്ത്രി ഒജെ ജനീഷിനെ കണ്ണൂരിലെ വിവിധയിടങ്ങളിൽ ആക്രമിച്ചതും ഇതേ ശൈലിയുടെ ഭാഗമായാണ്. കാലഹരണപ്പെട്ട രാഷ്ട്രീയശൈലിയാണ് സിപിഎം ഇപ്പോഴും പിന്തുടരുന്നതെന്ന് ചെന്നിത്തല പറഞ്ഞു.ബിജെപിയും സിപിഎമ്മും ഒരുമിച്ചാണ് ഇപ്പോൾ തെരുവിൽ അക്രമങ്ങൾ നടത്തുന്നത്. മന്ത്രി കെഎം ഷാജിയെ ഇന്നലെ യുവമോർച്ച നടുറോഡിൽ തടഞ്ഞ് ആക്രമിക്കാൻ ശ്രമിച്ചു. ക്രമസമാധാനം തകർക്കാനും ബിജെപിയും സിപിഎമ്മും ഒരേ മനസായി പ്രവർത്തിക്കുകയാണ്.
ഗ്യാനേഷ് കുമാറിനെതിരെ പ്രതിഷേധിക്കുമ്പോൾ സിപിഎമ്മിനെന്താണ് ഇത്ര വിഷമം? എം എ ബേബിയടക്കമുള്ളവർക്ക് ഇക്കാര്യത്തിലുള്ള അങ്കലാപ്പ് മനസിലാകുന്നില്ല. വോട്ടുചോരി വിഷയം അഖിലേന്ത്യാ തലത്തിൽ ഉയർത്തിപ്പിടിച്ച് കൊണ്ട് ഗ്യാനേഷ് കുമാറിനെതിരെ നടത്തുന്ന പ്രക്ഷോഭം ഇവിടെ സിപിഎമ്മിനെ ഭയപ്പെടുത്തുകയാണോയെന്നും ചെന്നിത്തല ചോദിച്ചു.സിപിഎം നേതാക്കളുടെ പിന്തുണയിലാണ് പ്രകോപനപരമായ ഈ മുദ്രാവാക്യങ്ങൾ ഉയരുന്നത്. ബിജെപി രാഷ്ട്രീയ പ്രതിസന്ധിയിലാകുമ്പോൾ അവരെ രക്ഷപ്പെടുത്തുന്ന ദൗത്യമാണോ സിപിഎം കൈക്കൊള്ളുന്നത്? മന്ത്രിമാരെ വഴിതടഞ്ഞാക്രമിക്കുന്ന സംഭവങ്ങൾക്ക് പിന്നിൽ ഗൂഡാലോചനയുണ്ടോയെന്ന് സംശയിക്കണം. ഒരു ഗുണ്ടായിസവും ഇവിടെ അനുവദിക്കില്ല. സമഗ്രമായ അന്വേഷണം നടക്കുന്നുണ്ട്. കുറ്റക്കാർക്കെതിരെ കർശന നടപടിയുണ്ടാവുമെന്നും ചെന്നിത്തല പറഞ്ഞു.
