ഖുര്‍ ആന്‍ മനപാഠ മല്‍സരം; ഗ്രാൻ്റ് ഫിനാലെ കൊയിലാണ്ടിയില്‍
- പാണക്കാട് സയ്യിദ് മുനവ്വറലി ശിഹാബ് തങ്ങള്‍ ഉദ്ഘാടനം ചെയ്യും
കൊയിലാണ്ടി : റിയാദു സ്വാലിഹീന്‍ ഫാമിലി ഗ്രൂപ്പ് ,കുവൈത്ത് സംഘടിപ്പിക്കുന്ന ഖുര്‍ആന്‍ മനപാഠ മല്‍സര അവസാന ഘട്ടം (ഗ്രാന്റ് ഫിനാലെ)ജൂലായ് 13ന് കൊയിലാണ്ടി മുന്നാസ് ഓഡിറ്റോറിയത്തില്‍ നടക്കുമെന്ന് സംഘാടകര്‍ പത്രസമ്മേളനത്തില്‍ അറിയിച്ചു.കാലത്ത് 9 മണിക്ക് പാണക്കാട് സയ്യിദ് മുനവ്വറലി ശിഹാബ് തങ്ങള്‍ ഉദ്ഘാടനം ചെയ്യും.
കേരളത്തിലെ വിവിധ ജില്ലകളില്‍ നിന്നായി അഞ്ഞൂറിലധികം വിദ്യാർത്ഥികള്‍ വിവിധതലങ്ങളില്‍ മല്‍സരിച്ചതിൽ, അവസാന റൗണ്ടില്‍ എത്തിയ 32 പേരാണ് ഗ്രാന്റ് ഫിനാലെയില്‍ പങ്കെടുക്കുന്നത്. മൂന്ന് കാറ്റഗറി ആയി തിരിച്ച മത്സരത്തിലെ ആദ്യ രണ്ടു കാറ്റഗറിയില്‍ പെടുന്ന കുട്ടികളില്‍ ഒന്നും രണ്ടും മൂന്നും സ്ഥാനക്കാര്‍ക്ക് 25000, 20000, 15000 രൂപ വീതം സമ്മാനം നല്‍കുന്നതും മറ്റു രണ്ടു കുട്ടികള്‍ക്ക് 5000 രൂപ വീതം പ്രോത്സാഹന സമ്മാനവും നല്‍കും. മൂന്നാമത്തെ കാറ്റഗറിയില്‍ പെടുന്ന കുട്ടികള്‍ക്ക് 50000, 40000, 30000 വീതം സമ്മാനം നല്‍കും. ബാക്കി വരുന്ന കുട്ടികള്‍ക്ക് 10000 രൂപ വീതം പ്രോത്സാഹന സമ്മാനവും നല്‍കും.
വൈകിട്ട് നാല് മണിക്ക് ഗ്രാന്റ് ഫിനാലെ സമാപിക്കും. സമാപന ചടങ്ങ് പാണക്കാട് സയ്യിദ് സ്വാദിഖലി ശിഹാബ് തങ്ങള്‍ ഉദ്ഘാടനം ചെയ്യും. വിജയികള്‍ക്കുള്ള ഉപഹാരങ്ങളും അദ്ദേഹം വിതരണം ചെയ്യും. ദാറുല്‍ ഹുദാ വൈസ് ചാന്‍സലര്‍ ഡോക്ടര്‍ ബഹാവുദ്ദീന്‍ നദവി മുഖ്യാതിഥിയായിരിക്കും. പത്രസമ്മേളനത്തില്‍ തറുവായി ഹാജി,സാലിഹ് ബാത്ത ,എം.എ.റഷീദ്, സയ്യിദ് അന്‍വര്‍ മുനഫര്‍ , അന്‍സാര്‍ കൊല്ലം എന്നിവര്‍ പങ്കെടുത്തു.
