മലബാർ റിവർ ഫെസ്റ്റിവൽ 2026 ആവേശം തുടങ്ങുന്നു; ജൂലൈ 30 മുതൽ ഓഗസ്റ്റ് 2 വരെ
- വടക്കൻ കേരളത്തിലെ പുഴകളിലെ വെല്ലുവിളികൾ നിറഞ്ഞ ഓളങ്ങളെ കീഴടക്കാൻ നൂറിലധികം വിദേശ കയാക്കിംഗ് താരങ്ങളാണ് ഇത്തവണ എത്തുന്നത്.
കോഴിക്കോട് :മലബാർ റിവർ ഫെസ്റ്റിവലിൻ്റെ (MRF) പത്താം പതിപ്പിന് വേദിയാകുന്നതിന്റെ ആവേശത്തിലാണ് കോഴിക്കോട്. ജൂലൈ 30 മുതൽ ഓഗസ്റ്റ് 2 വരെയാണ് ഈ സാഹസിക കായിക മാമാങ്കം നടക്കുന്നത്. വയനാട്ടിലേക്ക് യാത്ര പ്ലാൻ ചെയ്ത പലരും മത്സരങ്ങൾ നേരിൽ കാണാനായി ഇപ്പോൾ തുഷാരഗിരിയിലേക്ക് റൂട്ട് മാറ്റുകയാണ്. വടക്കൻ കേരളത്തിലെ പുഴകളിലെ വെല്ലുവിളികൾ നിറഞ്ഞ ഓളങ്ങളെ കീഴടക്കാൻ നൂറിലധികം വിദേശ കയാക്കിംഗ് താരങ്ങളാണ് ഇത്തവണ എത്തുന്നത്.
ലോകോത്തര താരങ്ങളുടെ പ്രകടനം കാണാൻ വലിയൊരു ജനക്കൂട്ടം തന്നെ ഇത്തവണ എത്തുമെന്നാണ് പ്രതീക്ഷിക്കുന്നത്.കൽപ്പറ്റയിലോ സുൽത്താൻ ബത്തേരിയിലോ ഉള്ള വിനോദസഞ്ചാരികൾക്ക് തുഷാരഗിരിയിലേക്ക് എളുപ്പത്തിൽ ഒരു ഏകദിന യാത്ര പ്ലാൻ ചെയ്യാം. പ്രകൃതിഭംഗി ആസ്വദിച്ചുകൊണ്ട് തന്നെ മത്സരങ്ങൾ സുരക്ഷിതമായി കാണാൻ ഇവിടെ സൗകര്യമുണ്ട്. പ്രധാന മത്സരങ്ങൾ നടക്കുമ്പോൾ വലിയ തിരക്ക് അനുഭവപ്പെടാൻ സാധ്യതയുള്ളതിനാൽ കാണികൾ നേരത്തെ തന്നെ സ്ഥലം ഉറപ്പിക്കുന്നത് നന്നായിരിക്കും. കോഴിക്കോട് നഗരത്തിൽ നടക്കുന്ന പ്രചാരണ പരിപാടികൾക്ക് വലിയ സ്വീകാര്യതയാണ് ലഭിക്കുന്നത്. മത്സരങ്ങൾ അടുത്തുനിന്ന് കാണാനായി പലരും തുഷാരഗിരിയിലെ ഹോംസ്റ്റേകളിലാണ് താമസം ബുക്ക് ചെയ്യുന്നത്.
