രാജ്യതലസ്ഥാനത്തെ ജനസാഗരമാക്കി ‘ഇന്ത്യ’ സഖ്യത്തിന്റെ ‘ചലോ ദില്ലി’ മഹാറാലി
- കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽനിന്ന് തുറന്ന വാഹനത്തിൽ രാഹുൽ ഗാന്ധിയുടെയും മറ്റ് മുതിർന്ന നേതാക്കളുടെയും നേതൃത്വത്തിലാണ് കൊണാട്ട് പ്ലേസിലേക്ക് മാർച്ച് ആരംഭിച്ചത്
ന്യൂഡൽഹി: രാജ്യതലസ്ഥാനത്തെ ജനസാഗരമാക്കി ‘ഇന്ത്യ’ സഖ്യത്തിന്റെ ‘ചലോ ദില്ലി’ മഹാറാലി. കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽനിന്ന് തുറന്ന വാഹനത്തിൽ രാഹുൽ ഗാന്ധിയുടെയും മറ്റ് മുതിർന്ന നേതാക്കളുടെയും നേതൃത്വത്തിലാണ് കൊണാട്ട് പ്ലേസിലേക്ക് മാർച്ച് ആരംഭിച്ചത്.കൊണാട്ട് പ്ലേസിൽനിന്ന് വൻ ജനപങ്കാളിത്തത്തോടെയുള്ള മഹാറാലിയായി രാംലീല മൈതാനത്തേക്ക് നീങ്ങാനാണ് സഖ്യത്തിന്റെ തീരുമാനം. അടുത്തകാലത്തൊന്നും കണ്ടിട്ടില്ലാത്ത വിധത്തിലുള്ള ജനസഞ്ചയമാണ് റാലിയിൽ പങ്കെടുക്കാനായി രാജ്യതലസ്ഥാനത്തേക്ക് ഒഴുകിയെത്തിയിരിക്കുന്നത്.രാഹുൽ ഗാന്ധിയാണ് മാർച്ച് നയിക്കുന്നത്. പ്രിയങ്കാ ഗാന്ധി, അഖിലേഷ് യാദവ്, മമത ബാനർജി, തേജസ്വി യാദവ്, ഡി. രാജ, എം.എ. ബേബി, ഫറൂഖ് അബ്‌ദുള്ള, കെ.സി. വേണുഗോപാൽ, പി.കെ. കുഞ്ഞാലിക്കുട്ടി, മെഹബൂബ മുഫ്തി, അഭിഷേക് ബാനർജി അടക്കമുള്ള പ്രതിപക്ഷ നേതാക്കൾ രാഹുലിനൊപ്പം റാലിയിൽ ഉണ്ട്.
നാല് ബസുകളിലായി എം.പി.മാരും രാഹുലിനൊപ്പമുണ്ട്. മഹാറാലിക്ക് പിന്തുണയുമായി സന്യാസികളും രംഗത്തെത്തിയിട്ടുണ്ട്. കമ്പ്യൂട്ടർ ബാബയുടെ നേതൃത്വത്തിലുള്ള സന്യാസിമാരും രാംലീല മൈതാനിയിൽ എത്തിയിട്ടുണ്ട്. രാവിലെത്തന്നെ രാംലീല മൈതാനിയിൽ ജനങ്ങൾ എത്തി തമ്പടിച്ചിരുന്നു. 12 മണിയോടെയാണ് രാഹുൽ ഗാന്ധിയും ഇന്ത്യ സഖർ നേതാക്കളും ഖാർഗെയുടെ വസതിയിൽനിന്ന് കോണാട്ട് പ്ലേസിലേക്ക് നീങ്ങിയത്.
