കാര്യവട്ടം കോളേജിലെ റാഗിങ് ; എസ്എഫ്ഐ പ്രവർത്തകർക്ക് സസ്പെൻഷൻ
- കോളേജിലെ റാഗിങ് കമ്മിറ്റിയുടെ റിപ്പോർട്ടിന്റെ അടിസ്ഥാനത്തിൽ കഴക്കൂട്ടം പോലീസ് അന്വേഷണം തുടങ്ങിയിട്ടുണ്ട്
തിരുവനന്തപുരം:കാര്യവട്ടം ഗവൺമെൻ്റ് കോളേജിൽ ഒന്നാം വർഷ ബിരുദ വിദ്യാർത്ഥിയെ റാഗിങ് ചെയ്ത സംഭവത്തിൽ എസ്എഫ്ഐ പ്രവർത്തകരായ ഏഴുപേരെ സസ്പെൻഡ് ചെയ്തു.എസ്എഫ്ഐ യൂണിറ്റ് സെക്രട്ടറിയടക്കമുള്ളവരാണ് പ്രതിപ്പട്ടികയിലുള്ളത്.മൂന്നാം വർഷ ബിരുദധാരികളെയാണ് സസ്പെൻഡ് ചെയ്തത്.
വിവസ്ത്രനാക്കിയും മുളവടികൊണ്ട് തലയ്ക്കടിച്ചും തുപ്പിയ വെള്ളം കുടിപ്പിച്ചുമായിരുന്നു വിദ്യാർത്ഥിയോട് പ്രതികൾ ക്രൂരത കാണിച്ചത്. കോളേജിലെ റാഗിങ് കമ്മിറ്റിയുടെ റിപ്പോർട്ടിന്റെ അടിസ്ഥാനത്തിൽ കഴക്കൂട്ടം പോലീസ് അന്വേഷണം തുടങ്ങിയിട്ടുണ്ട്. സിസിടിവി ദൃശ്യങ്ങളും സാക്ഷിമൊഴിയും പരിശോധിച്ചാണ് റാഗിങ് കമ്മിറ്റി റിപ്പോർട്ട് സമർപ്പിച്ചത്. ഒരു മണിക്കൂറോളം എസ്എഫ്ഐ പ്രവർത്തകർ യൂണിറ്റ് റൂമിൽ തടഞ്ഞുവെച്ച് വിചാരണ ചെയ്തുവെന്നും തന്നെ അതിക്രൂരമായി പ്രവർത്തകർ ഉപദ്രവിച്ചെന്നുമാണ് റാഗിങ്ങിനിരയായ വിദ്യാർത്ഥി പറയുന്നത്. അതേസമയം പോലീസ് അന്വേഷണത്തിലൂടെ സത്യം പുറത്തുവരട്ടെയെന്നും പിന്നീട് പ്രതികരിക്കാമെന്നുമാണ് എസ്എഫ്ഐ തിരുവനന്തപുരം ജില്ലാ നേതൃത്വത്തിന്റെ വിശദീകരണം.
