അന്താരാഷ്ട്ര യോഗ ദിനം: 30 കേരള ബറ്റാലിയൻ എൻസിസിയുടെ നേതൃത്വത്തിൽ കൂട്ടായ യോഗാഭ്യാസം സംഘടിപ്പിച്ചു

• അന്താരാഷ്ട്ര യോഗ ദിനാചരണത്തിന്റെ ഭാഗമായി 30 കേരള ബറ്റാലിയൻ എൻസിസിയുടെ കീഴിലുള്ള വിവിധ വിദ്യാഭ്യാസ സ്ഥാപനങ്ങളിലെ എൻസിസി കേഡറ്റുകൾ പങ്കെടുത്ത കൂട്ടായ യോഗാഭ്യാസ പ്രദർശനം കൊയിലാണ്ടി സ്റ്റേഡിയത്തിൽ സംഘടിപ്പിച്ചു.

കൊയിലാണ്ടി: അന്താരാഷ്ട്ര യോഗ ദിനാചരണത്തിന്റെ ഭാഗമായി 30 കേരള ബറ്റാലിയൻ എൻസിസിയുടെ കീഴിലുള്ള വിവിധ വിദ്യാഭ്യാസ സ്ഥാപനങ്ങളിലെ എൻസിസി കേഡറ്റുകൾ പങ്കെടുത്ത കൂട്ടായ യോഗാഭ്യാസ പ്രദർശനം കൊയിലാണ്ടി സ്റ്റേഡിയത്തിൽ സംഘടിപ്പിച്ചു. ശാരീരികവും മാനസികവുമായ ആരോഗ്യം കൈവരിക്കുന്നതിനും ജീവിതശൈലി രോഗങ്ങളെ പ്രതിരോധിക്കുന്നതിനും യോഗയുടെ പ്രാധാന്യം സമൂഹത്തിന് മുന്നിൽ അവതരിപ്പിക്കുന്നതായിരുന്നു പരിപാടിയുടെ ലക്ഷ്യം.എസ്എൻഡിപി കോളേജ് കൊല്ലം, ജിവിഎച്ച്എസ്എസ് കൊയിലാണ്ടി, സിഎംസി ഹൈസ്കൂൾ എലത്തൂർ, തിരുവങ്ങൂർ ഹൈസ്കൂൾ, പൊയിൽക്കാവ് ഹൈസ്കൂൾ, ജിഎച്ച്എസ്എസ് പയ്യോളി എന്നിവിടങ്ങളിൽ നിന്നുള്ള മുന്നൂറോളം എൻസിസി കേഡറ്റുകൾ യോഗാഭ്യാസത്തിൽ പങ്കാളികളായി.

ഐക്യവും അച്ചടക്കവും ആരോഗ്യകരമായ ജീവിതശൈലിയും വളർത്തിയെടുക്കുന്നതിന് യോഗ നൽകുന്ന സന്ദേശം പരിപാടിയിലൂടെ വിദ്യാർഥികൾക്ക് പകർന്നുനൽകി.യോഗ പരിശീലകനായ അമൃത് കെ യോഗ ക്ലാസിനും പരിശീലനത്തിനും നേതൃത്വം നൽകി. വിവിധ യോഗാസനങ്ങളും ശ്വാസനിയന്ത്രണ പരിശീലനങ്ങളും കേഡറ്റുകൾ അഭ്യസിച്ചു.എൻസിസി ഓഫീസർമാരായ ജിനേഷ് കെ.എം., ശ്രീരാജ് പി., ലവീൻ വി., മുസ്ലിഹ്, അനിൽകുമാർ എന്നിവർ പരിപാടിക്ക് നേതൃത്വം നൽകി. ലോകമെമ്പാടും ആരോഗ്യം, സമാധാനം, ആത്മനിയന്ത്രണം എന്നിവ പ്രോത്സാഹിപ്പിക്കുന്നതിനായി ആചരിക്കുന്ന അന്താരാഷ്ട്ര യോഗ ദിനത്തിന്റെ സന്ദേശം ജീവിതത്തിൽ പ്രാവർത്തികമാക്കാൻ എല്ലാവരും മുന്നോട്ടുവരണമെന്ന് സംഘാടകർ ആഹ്വാനം ചെയ്തു.