കൊയിലാണ്ടിയിൽ കൗതുകമായി റോളർ സ്കേറ്റിംഗ് സംസ്ഥാന മത്സരം; കാഴ്ചക്കാരായി നാട്ടുകാരും

• ശ്രീലാൽ പെരുവട്ടൂർ

കൊയിലാണ്ടി: കൊയിലാണ്ടിക്ക് പരിചിതമല്ലാത്ത കാഴ്ചകളൊരുക്കി റോളർ സ്കേറ്റിംഗ് സംസ്ഥാന ചാമ്പ്യൻഷിപ്പ്. കോമത്ത് കര ബൈപ്പാസിൽ പ്രത്യേകം സജ്ജീകരിച്ച റോഡിലാണ് കേരള റീജിയണൽ റോളർ സ്കേറ്റിംഗ് ചാമ്പ്യൻഷിപ്പ് നടക്കുന്നത്. കേരളത്തിലെ വിവിധ ജില്ലകളിൽ നിന്നായി 151 ഓളം കുട്ടികളാണ് മത്സരത്തിൽ പങ്കെടുക്കുന്നത്.

നാല് സോണുകളായി തിരിച്ചാണ് മത്സരങ്ങൾ സംഘടിപ്പിച്ചിരിക്കുന്നത്. അതിവേഗത്തിൽ സ്കേറ്റുകളിലേറി മത്സരാർഥികൾ റോഡിലൂടെ കുതിക്കുന്ന കാഴ്ച കൊയിലാണ്ടിക്കാർക്ക് വേറിട്ട അനുഭവമായി. ഇതോടെ മത്സരവേദിയിലേക്ക് നിരവധി നാട്ടുകാരും എത്തി. റോളർ സ്കേറ്റിംഗിന്റെ ആവേശകരമായ മത്സരങ്ങൾ കാണാൻ കുട്ടികളും മുതിർന്നവരുമടക്കം വലിയ ജനക്കൂട്ടമാണ് ബൈപ്പാസിൽ എത്തുന്നത്.

റോളർ സ്കേറ്റിംഗ് മത്സരങ്ങൾ സാധാരണയായി കൊയിലാണ്ടിയിൽ അധികം കാണാത്തതിനാൽ തന്നെ മത്സരവേദി നാട്ടുകാർക്ക് കൗതുകക്കാഴ്ചയായി മാറിയിരിക്കുകയാണ്. ഹെൽമറ്റും സുരക്ഷാ ഉപകരണങ്ങളും ധരിച്ച് മത്സരാർഥികൾ വേഗത്തിൽ മുന്നേറുമ്പോൾ കൈയടികളോടെയാണ് കാഴ്ചക്കാർ പ്രോത്സാഹിപ്പിക്കുന്നത്.

ചേവരമ്പലം സെൻറ് മേരീസ് ഇംഗ്ലീഷ് മീഡിയം സ്കൂളിന്റെ നേതൃത്വത്തിലാണ് ചാമ്പ്യൻഷിപ്പിന്റെ പ്രധാന സംഘാടന പ്രവർത്തനങ്ങൾ നടക്കുന്നത്. സംസ്ഥാനത്തിന്റെ വിവിധ ഭാഗങ്ങളിൽ നിന്നെത്തിയ താരങ്ങളും പരിശീലകരും രക്ഷിതാക്കളും കൊയിലാണ്ടിയിൽ ഒത്തുചേർന്നതോടെ നഗരത്തിന് പുതിയൊരു കായിക ആവേശവും ലഭിച്ചു.

വേഗവും മികവും ആവേശവും നിറഞ്ഞ റോളർ സ്കേറ്റിംഗ് മത്സരങ്ങൾ കൊയിലാണ്ടിക്ക് സമ്മാനിക്കുന്നത് കായികരംഗത്തെ വേറിട്ടൊരു കാഴ്ച തന്നെയാണ്.