കൊയിലാണ്ടി ഗവ. ആശുപത്രിക്ക് മുന്നിൽ സീബ്രാലൈൻ മാഞ്ഞിട്ട് മാസങ്ങൾ; അപകടഭീതിയിൽ യാത്രക്കാർ

• ശ്രീലാൽ പെരുവട്ടൂർ

കൊയിലാണ്ടി: കൊയിലാണ്ടി ഗവൺമെന്റ് ആശുപത്രിക്ക് മുന്നിലെ സീബ്രാലൈൻ മാഞ്ഞുപോയിട്ട് മാസങ്ങളായിട്ടും പുനഃസ്ഥാപിക്കാൻ നടപടിയില്ലാത്തത് യാത്രക്കാരെയും നാട്ടുകാരെയും ആശങ്കയിലാക്കുന്നു. നിരവധി അപകടങ്ങൾ നടന്നിട്ടുള്ളതും ജീവഹാനി സംഭവിച്ചിട്ടുള്ളതുമായ ഈ ഭാഗത്ത് റോഡ് മുറിച്ചുകടക്കുന്നത് ജീവൻ പണയം വെച്ചുള്ള യാത്രയായി മാറിയിരിക്കുകയാണെന്ന് പ്രദേശവാസികൾ പറയുന്നു.

ആശുപത്രിയിലേക്ക് എത്തുന്ന രോഗികളും കൂട്ടിരിപ്പുകാരും ജീവനക്കാരും ഉൾപ്പെടെ നിരവധി പേരാണ് ദിവസേന ഈ ഭാഗത്ത് റോഡ് മുറിച്ചുകടക്കുന്നത്. സീബ്രാലൈൻ മാഞ്ഞതോടെ റോഡ് മുറിച്ചുകടക്കേണ്ട സ്ഥലം സംബന്ധിച്ച് വാഹനയാത്രക്കാർക്ക് വ്യക്തമായ മുന്നറിയിപ്പോ സൂചനയോ ലഭിക്കുന്നില്ല. പ്രത്യേകിച്ച് ദൂരയാത്രക്കാരായ വാഹനങ്ങൾ അമിത വേഗതയിൽ എത്തുമ്പോൾ കാൽനടയാത്രക്കാർക്ക് അപകടസാധ്യത കൂടുതലാണെന്ന് സമീപത്തെ വ്യാപാരികളും നാട്ടുകാരും ചൂണ്ടിക്കാട്ടുന്നു.

ബസ് സ്റ്റാൻഡ് പരിസരത്തും അപകടഭീഷണി

കൊയിലാണ്ടി ടൗണിലെ ബസ് സ്റ്റാൻഡ് പരിസരത്തും സ്ഥിതി ആശങ്കാജനകമാണ്. പഴയ ബസ് സ്റ്റാൻഡിലേക്ക് കടന്നുപോകുന്ന ഭാഗത്ത് വ്യക്തമായ സീബ്രാലൈനുകളോ ആവശ്യമായ വേഗനിയന്ത്രണ സംവിധാനങ്ങളോ ഇല്ലാത്തത് വലിയ അപകടങ്ങൾക്ക് വഴിവെക്കുമെന്നാണ് നാട്ടുകാരുടെ പരാതി. തിരക്കേറിയ ടൗൺ പ്രദേശമായതിനാൽ കാൽനടയാത്രക്കാരും വാഹനങ്ങളും ഒരേസമയം സഞ്ചരിക്കുന്ന ഈ ഭാഗത്ത് സുരക്ഷാ സംവിധാനങ്ങൾ അടിയന്തരമായി ഒരുക്കണമെന്നാണ് ആവശ്യം.

വിദ്യാർത്ഥികൾക്കും റോഡ് മുറിച്ചുകടക്കാൻ സുരക്ഷിത സംവിധാനമില്ല

കൊയിലാണ്ടി ഗവൺമെന്റ് വൊക്കേഷണൽ ഹയർ സെക്കൻഡറി സ്കൂളിലെ വിദ്യാർത്ഥികൾക്കും റോഡ് മുറിച്ചുകടക്കാൻ ആവശ്യമായ സുരക്ഷാ സംവിധാനങ്ങളുടെ അഭാവം വലിയ ബുദ്ധിമുട്ടാണ് സൃഷ്ടിക്കുന്നത്. സ്കൂൾ പരിസരത്ത് വിദ്യാർത്ഥികളുടെ സുരക്ഷ കണക്കിലെടുത്ത് സീബ്രാലൈൻ സ്ഥാപിക്കണമെന്ന ആവശ്യം പലതവണ ബന്ധപ്പെട്ട ദേശീയപാത അധികൃതരുടെ ശ്രദ്ധയിൽപ്പെടുത്തിയിട്ടും ഇതുവരെ പരിഹാരം ഉണ്ടായിട്ടില്ലെന്നാണ് നാട്ടുകാരുടെ ആരോപണം.

സ്കൂൾ സമയങ്ങളിൽ നൂറുകണക്കിന് വിദ്യാർത്ഥികളാണ് റോഡിന്റെ ഇരുവശത്തേക്കും സഞ്ചരിക്കുന്നത്. വാഹനത്തിരക്കേറിയ ദേശീയപാത മുറിച്ചുകടക്കേണ്ടിവരുന്ന വിദ്യാർത്ഥികളുടെ സുരക്ഷ ഉറപ്പാക്കാൻ അടിയന്തരമായി സീബ്രാലൈനും ആവശ്യമായ മറ്റ് റോഡ് സുരക്ഷാ സംവിധാനങ്ങളും ഒരുക്കേണ്ടതുണ്ടെന്നാണ് രക്ഷിതാക്കളുടെയും നാട്ടുകാരുടെയും ആവശ്യം.

അപകടങ്ങൾ സംഭവിച്ചതിന് ശേഷം മാത്രം നടപടിയെടുക്കുന്ന സമീപനം ഒഴിവാക്കി, അപകടസാധ്യതയുള്ള സ്ഥലങ്ങൾ മുൻകൂട്ടി കണ്ടെത്തി സുരക്ഷാ സംവിധാനങ്ങൾ ഒരുക്കണമെന്നാണ് പ്രദേശവാസികൾ പറയുന്നത്. ഗവ. ആശുപത്രിക്ക് മുന്നിൽ സീബ്രാലൈൻ പുനഃസ്ഥാപിക്കുക, ബസ് സ്റ്റാൻഡ് പരിസരത്ത് കാൽനടയാത്രക്കാർക്കായി സുരക്ഷിത ക്രോസിംഗ് സംവിധാനം ഒരുക്കുക, ജിവിഎച്ച്എസ്എസ് കൊയിലാണ്ടിക്ക് മുന്നിൽ സീബ്രാലൈൻ സ്ഥാപിക്കുക തുടങ്ങിയ ആവശ്യങ്ങളിൽ ബന്ധപ്പെട്ട ദേശീയപാത, ഗതാഗത, പൊലീസ് അധികൃതർ അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം.

അപകടം കാത്തുനിൽക്കാതെ നടപടി വേണം

ജനങ്ങളുടെ ജീവന് നേരിട്ട് ഭീഷണിയാകുന്ന ഇത്തരം പ്രശ്നങ്ങളിൽ അധികൃതരുടെ അടിയന്തര ഇടപെടൽ ഉണ്ടാകണമെന്നാണ് ആവശ്യം. റോഡിലെ വരകൾ മാഞ്ഞുപോകുന്നത് ചെറിയൊരു സാങ്കേതിക പ്രശ്നമായി കാണാതെ, അത് കാൽനടയാത്രക്കാരുടെ സുരക്ഷയുമായി ബന്ധപ്പെട്ട ഗുരുതര വിഷയമായി പരിഗണിക്കണമെന്നും നാട്ടുകാർ ആവശ്യപ്പെടുന്നു. അപകടം സംഭവിച്ച ശേഷം പരിഹാരം കാണുന്നതിന് പകരം, അപകടം ഒഴിവാക്കുന്നതിനുള്ള മുൻകരുതൽ നടപടികൾ ഉടൻ സ്വീകരിക്കണമെന്നാണ് പൊതുവേയുള്ള ആവശ്യം.. ശ്രീലാൽ പെരുവട്ടൂർ